.png)
بغلان ولایتی نینگ مرکزی پلخمری شهریده سوداگرلیک قیله‌دیگن ایرسیز عیاللردن اونلرچه‌سی نینگ ایتیش‌لریچه، شهر قرنطین بولگنی باعث، ییش گه آذیق-آوقت‌لری یوق دیر.
اوشبو عیاللر یاردم قولگه کیریتیش اوچون بغلان ولایت مقامی نینگ برابریده توپله‌نیب ایتیش‌لریچه، بغلان محلی حکومتی و کرونا ویروسی باعث شاشیلینچ وضعیت نی مدیریت قیلووچی کمیته، پلخمری شهری قرنطین قیلینگنده، کونده‌لیک ایشلاوچی و نیازمند کیشی‌لرگه یاردم ییتکزیش خصوصیده، سوز بیریشگن.
بیراق، اوشبو عیاللرگه کوره، سوز بیریلگنیدن ایکی کون اوتیب اولرگه هیچ قنده‌ی یاردم بیریلمه‌گن.
پلخمری شهریده سوداگرلیک قیله‌دیگن رخسارنینگ ایتیشیچه، ایکی کیچه-کوندوز دن بویان ییش گه آذیق-آوقتی یوق دیر.
اونینگ کوپه‌یتیریشیچه، ایکی کوندن بویان بغلان ولایت مقامی نینگ برابریده یاردم قولگه کیریتیش اوچون ساعت‌لرچه کوته‌دی، بیراق حاضرگه‌قدر هیچ یاردم قولگه کیریتمه‌گن.
سوداگرعیاللردن باشقه بیری بی‌بی‌گل، اوشبو ولایت سرپرستی‌نی نیازمندلرنینگ قیین‌چیلیک‌لرینی تیکشیریش خصوصیده، بی‌فرق یانده‌شیش گه عیب‌لیدی.
.png)
بغلانده نیازمند عیاللردن باشقه بیر شهلانینگ ایتیشیچه، اوغلی قول ساتووچیلیک بیلن روزگار تیبره‌ته‌دی، بیراق شهر قرنطین بولگنی اوچون ایش‌دن قالیب و توشکونلیک‌که دوچار بولگن.
اوشبو سوداگر عیاللرنینگ آگاه‌لنتیریشیچه، قیین‌چیلیک‌لری تیکله‌نیب و اولرگه یاردم بیریلمه‌گن صورتده، گروهی شکلده بغلان ولایت مقامی برابریده خودکش‌لیک قیلیشه‌دی.
عین حالده، بغلان ولایتی بوییچه کرونا ویروسی باعث، شاشلینچ وضعیتنی مدیریت قیلووچی کمیته باشلیغی قدرت‌الله نینگ ایتیشیچه، نیازمندلرگه یاردم بیریش اوچون اوشبو ولایت نینگ سوداگرلریدن بیرقطاری بیلن اوچره‌شگن. اونگه کوره، تیزلیک‌که مذکور شهرده کونده‌لیک ایشلاوچی و نیازمندلرگه یاردم ترقه‌تیش جریانی باشلنه‌دی.
دولت مملکت‌ده کرونا ویروسی رواجلنیشی نینگ آلدینی آلیش اوچون شهرلردن بیرقطاری، جمله‌دن کابل، هرات، نیمروز، بغلان و باشقه بیرقطار شهرلرده کونده‌لیک یوریش چیکلاو تعیین قیلگن.
افغانستانده حاضرگه‌قدر کرونا ویروسی گه چلینگن‌لرنینگ رقمی 423 کیشی گه ییتیشگن و بو آره‌دن ایکی ایجابی واقعه بغلان ولایتیده رویخط گه آلینگن.
