سمنگان محلی مسؤوللری نینگ ایتیشیچه، اوشبو ولایت نینگ تاش کومیر کانیده یوز بیرگن پارتلشده چمهسی 50 ایشلاوچی ییر آستیده قالگن.
سمنگان ولایت کینگشی نینگ سرپرستی و اورین باسری محمدهاشم سروری نینگ سلاموطندارگه ایتیشیچه، دره صوف بالا تومنیده جایلشگن کان ده یوز بیرگن پارتلش ده باشقه ایکی کان بوزیلگن و 50 دن آرتیق ایشلاوچی ییر آستیده قالگن.
اونگه کوره، بو واقعه بوگون «سهشنبه، 20- جوزا» توشدن کیین مذکور تومن نینگ «شباشک» منطقهسیده جایلشگن کان ده یوز بیرگن. او، بو واقعه قربانلری توغریسیده هیچ نرسه دیمهیدی.
سمنگان ولایت کینگشی اورین باسری نینگ ایتیشیچه، یالغیز محل اهالیسی ییر آستیده بند قالگنلرنی قوتقریش اوچون منطقه گه باریشگن و حکومت حاضرگهقدر هیچ بیر ایش قیلمهگن.
دره صوف بالا ولسوالی سلطان سلطانی، کان ایشلاوچیلریدن نقل قیلیب ایتیشیچه، کمیده 20 کیشی ییر آستیده بند قالگن. اونینگ ایتیشیچه، بند قالگنلرنی قوتقریش اوچون تیکشیرووچی و ساغلیک تیمی حادثه محلی گه ییتیشگن.
شمال تاش کومیر تصدی ریاستی، حاضرگهقدر بو واقعه توغریسیده هیچ نرسه دیمهگن.
شباشک تاش کومیر کانی سمنگان ولایتی نینگ غرب تامانینی 140 کیلومترلیگی دره صوف بالا تومنیده جایلشگن. بو کان قویاش 1345- ییل ده منطقه اهالیسی تامانیدن کشف ایتیلگن.
