د سرپل د ولایتي شورا مرستیال سید اسدالله دانش سلام وطندار ته وویل چې غیرمسوول وسلهوال د دې ولایت په بلخاب ولسوالۍ کې د ډبرو سکرو کان په را اېستلو بوخت دي او هره بورۍ يې چې د کابل ۱۰ منه کېږي ۵۰ نه تر ۶۰ افغانۍ پلوري.
د سرپل د ولایتي شورا د مرستیال په خبره چې په وروستیو کې په یادې ولسوالۍ کې لانجې هم ډېر شوېدي.
د بلخاب ولسوالۍ یو شمېر اوسېدونکي هم وایي چې غیر مسوول وسلهوال او د دې ولسوالۍ یو ځېنې اوسېدونکي ـ چې د زورواکیو ملاتړ ور سره دی ـ په غیرقانوني توګه د ډبرو سکرو کانونه را اوباسي.
د سرپل د بلخاب ولسوالۍ دوه تنه اوسېدونکي احمد او عليرضا سلام وطندار سره په خبرو کې دا چاره د هېواد ملي اقتصاد ته ستر زیان بولي. دوی د زورواکیو او طالبانو له لوري د کانونو خپلسرې کیندنه د اندېښنې وړ بولي.
خو د سرپل د والي ویاند ذبیحالله اماني وايي چې تر اوسه یې هیڅ دا سې خبر نهدی اورېدلی چې د بلخاب ولسوالۍ د ډبرو سکرو کان دې غیرمسوول وسلهوال استخراج کړي.
دی په ورته وخت کې د کانونو وزات له لوري د کانونو د ژر استخراج د تړونونو د لاسلیک خبره کوي.
بلهخوا د سرپل د بلخاب ولسوال عبدالله انصاري د غیرمسوول وسلهوالو کسانو له فعالیته اندېښنه څرګندوي او وايي چې دوی تر اوسه د ډبرو سکرو د را اېستنې لهپاره پهدې ولسوالۍ کې د یوې قانوني شورا په رامنځته کولو نهدي بریالي شوي.
