سرپل‌نینگ صیاد تومنی مذکور ولایت مرکزی‌نینگ نیچه کیلومترلیگی‌ده جایلشگن و بو ولایت‌نینگ ناتینچ تومن‌لریدن بیری سنله‌دی.
ترقه‌تیلگن گزارشلر اساسیده، اوشبو تومن‌ده طالبان و داعش گروه‌لری کینگ شکلده فعالیت قیله‌دیلر.
سلام‌و طندارگه صحبت بیرگن سرپل ولایت کینگشی اعضاسی محمدحسین مجاهدزاده نینگ ایتیشیچه، قولگه کیریتگن معلوماتی، مذکور ولایت‌نینگ صیاد تومنیده‌گی نفت کانی داعش و طالبان گروه‌لری تامانیدن ایشلب چیقاریلیشی‌نی کورسته‌دی.
سرپل ولایت کینگشی‌نینگ اوشبو اعضاسیگه کوره، بو ایش دوام ایتگن صورتده، مذکور گروه‌لر کیره‌کلی نرسه‌لرینی تأمین قیله‌دیلر.
سرپل ولایتی صیاد تومنی‌نینگ نفت کانی نیچه دهه دن بویان 3 قمست‌دن ایشلب چیقاریله‌دی و حاضر اوشبو کان‌نینگ کپه‌زار قسمتی دولت‌گه قرشی قوراللی عصیانچیلرنینگ نظارتی‌ده بولگن.
سلام‌وطندارگه صحبت بیرگن سرپل ولایتی‌نینگ صیاد تومنی کپه‌زار اهالیسی عبدالجبارنینگ ایتیشیچه، داعش و طالبان گروهی اهالی همکارلیگی‌ده مذکور کان‌نینگ نفتی‌نی ایشلب چیقاریب و ساتیش‌گه باشله‌گن‌لر.
شونینگ‌دیک، سرپل حاکمی سوزلاوچیسی ذبیح‌الله امانی‌نینگ ایتیشیچه، محل‌دن اولرگه ییتیب کیلگن گزارشلرده، صیاد تومنی‌نینگ نفت کانی عصیانچی گروه‌لر تامانیدن ایشلب چیقاریلیشی بیلدیریلگن.
قولگه کیریتیلگن معلومات اساسیده، صیاد تومنی‌نینگ انگوت نفت کانی‌نی ایشلب چیقاریش شرطنامه 1390- ییل چین‌لیک بیر شرکت گه تاپشیریلگن، بیراق جمهور رییس تامانیدن صادر ایتیلگن فرمان اساسیده، مذکور کان‌نی ایشلب چیقاریش ایشی توخته‌تیلگن.
داعش و طالبان گروهی حاضرگچه بوتوغریده میدیاگه هیچ نرسه دیمه‌گن‌لر.
