مجلس نینگ اوتگن کونگی (تشقی ایشلر، ایش و اجتماع و فواید عامه) وزیرلرینی ایشدن آلگنی عاقبتیده، بوگون ایسه سالیق/مالیه وزیری اکلیل حکیمی، ترانسپورت وزیری محمدالله بتاش و معارف وزیری اسدالله حنیف بلخی‌لرنی استیضاح قیلدی و جناب حکیمی ایشانچ آوازی آلیشی بیلن ینه جاییده قالدی.
اوشبو وزیرلرنینگ استیضاح قیلیشدن هدف، بودجه نینگ 70 فایزینی مصرف قیلمه‌گنلری، قانوننی نظرده توتمه‌گنلیکلری، آلدیندن تولیدیگن پوللرنی تولمه‌گنلری دیب ایتیلگن.
معارف و ترانسپورت وزیرلری 51 و 68 ایشانچ آواز آلیشلری بیلن صلاحیت سیز و اکلیل حکیمی هم 85 ایشانچ آواز آلیشی بیلن جاییده قالدی.
وزیرلر کیلمسدن کینگش بولرنی استیضاح قیلدی. اولر کینگش اولتیریشیده کیلیشنی قبول قیلگن ایدیلر، حاضر بولمه‌دیلر و نماینده‌لر ایسه ساعتلر بحث اوتکزیشلری بیلن اخیرده بیرساعت مهلت بیریب، یوغلیکلریده اولرگه رأی بیردیلر.
کورینیشیچه، نماینده‌لر، حکومتگه قرشی وزیرلرنی صلاحیت سیز قیلیشگه بیل باغله‌گنلر. اوتگن کون مجلس تامانیدن وزیرلر صلاحیت سیز قیلیشدن نیچه ساعت اوتمسدن، جمهورلیک سرایی خبرنامه ترقه‌تیشی بیلن کابینه اعضالری نمایده‌لر تامانیدن صلاحیت سیز قیلیشی درست ایمس دیدی و «وزیرلرنینگ ایشلریدن انیق معلوماتلری یوق» دیب یازگن.
اوتگن کیچه جمهور رییس، نماینده‌لرمجلسی اداری هیأتنی ارگ گه چقیرگن ایدی و وزیرلرنی استیضاح قیلیشدن اوتیشلرینی ایسته‌گن ایدی.
ارگ نینگ بو ایشی، نماینده‌لردن کوپیسینی غضبلنتیردی. اولر بوگونکی اولتیریشده، حکومت بونقه عکس‌العمللری بیلن مجلس نینگ ایرکینلیگینی نظرده توتمه گن دیدیلر.
