.jpg)
که څه هم زرګونه پناهغوښتونکي له تېرې یوې نیمې اوونۍ راهیسې د یونان پر پوله پراته دي، خو د یاد هېواد دروازه تر اوسه د هغوی پر مخ تړلې ده.
د هرې ورځې په تېرېدو سره په دې سیمه کې د کډوالو وضعیت سختېږي؛ کډوالو په وروستي مورد کې د پولیسو د ډزو په غبرګون کې د پولې کرښه وسوځوله.
یوشمېر کډوال له یوناني ځواکونو سره د ترکیې د پولهساتو ځواکونو د نښتې خبر ورکوي، خو دا خبر تر اوسه په رسمي ډول نه دی تایید شوی.
هغه ویډیوګانې چې سلاموطندار ته رسېدلي، د یوناني ځواکونو له لوري ډزې او د اوښکوبهوونکي ګاز شیندل ښيي. کډوالو د دې کار په غبرګون کې د یونان پولهساتي ځواکونو په تیږو ولي.
په دې ویډیو کې یوه ټپي شوې ښځه ښکاري چې نه یې د وضعیت ارزولو لپاره امبولانس شته او نه هم لومړني امکانات.
هغه تصویرونه چې کډوالو سلاموطندار ته رالېږلي، ښيي چې پولې ته د ترکیې نږدې روغتونونه له هغو کډوالو ډک دي چې له یوناني ځواکونو سره په نښتو کې ټپیان شوي یا هم د سړې هوا له کبله زیانمن شوي، لکه دا ښځه چې د نښتو په پایله کې یې ماشوم زیان کړی دی. خو تر اوسه د ټپي شویو کډوالو یا زیانمنو کسانو په اړه هېڅ ډول رسمي شمېرې نه دي خپرې شوي.
کډوالو اوس د پولې په صفري برخه کې کيږدۍ وهلي او ظاهراً ښکاري چې اروپا ته د رسېدو لپاره پر خپلو ژمنو ولاړ دي.
.jpeg)
له کرونا وروسته د کډوالو ناورین
اروپايي اتحادیې ګواښ کړی چې د دغه هېواد پولې به د هغو کسانو لپاره خلاصې نه کړي چې اروپايي هېوادونو ته د تګ جواز ونه لري. اروپايي اتحادیې له کډوالو هم غوښتي چې د یونان پولې خوا ته ور نه شي؛ ځکه هېڅکله به یې پولې پر وړاندې خلاصې نه شي.
د ډېری پناه غوښتونکيو موخه المان دی؛ خو المان ويلي چې نور لکه ۲۰۱۵ له پرانيستو پولو سياست نه ملاتړ نه کوي.
الماني چارواکي هڅه کوي چې په يونان کې د پناه غوښتونکيو بحران سره مالي مرسته وکړي؛ خو تر اوسه د مرستو کچه معلومه نه ده او پر يادې موضوع بحث کوي.
ماشومان، تنکي ځوانان او کورنۍ ډېری د يونان په پوله له خطر سره مخ دي. د المان حکومت اروپا ته د کډوالو د بندیز له کلک ملاتړ سره سره بيا هم المان ويلي چې چمتو دي دې هېواد ته يو شمېر ماشومان او تنکي ځوانان د کډوالۍ په موخه ورشي او دوی ورته چمتووالی نيولی دی.
په دې وروستيو ورځو کې د المان په هامبورګ او برلين کې د کډوالو په ملاتړ لاريونونه وشول. په يونان کې هم د تسالونيکي ښار اوسېدونکيو د يونان د پولهساتو ساتونکيو له لوري د کډوالو د رټلو او وهلډبلو په غبرګون کې لاريونونه وشول.
خو په تازه نظر پوښتنه کې ليدل کېږي چې د يونان له ۸۰ سلنه نه ډېرو وګړيو د کډوالو د بندیز په اړه د يونان د کډوالۍ له سياسته ملاتړ کړی دی.
اروپايي اتحاديه په دې باور ده چې کډوالو ته د پولو پرانيستل د ترکیې فشار ته تسلیمېدو معنا لري.
اروپا له ترکيې غوښتي چې د ۲۰۱۶ هوکړې ته ژمن و اوسي. د هغې هوکړې له مخې به ترکيه هر کال د اروپا له اتحاديې نه يو ميليارد ډالره اخلي چې کډوالو ته د اوسېدو ځای ورکوي؛ خو ترکيه بيا هم کډوال دې ته هڅوي چې د يونان پولې ته لاړ شي.
د یونان په پوله کې د کډوالو کړکېچ د کرونا ویروس له خپرېدو وروسته د اروپايي رسنيو دويم بحث دی.
د رسنيو له فشارونو سره سره تر اوسه پورې هېڅ د دې بحران حل لپاره لار نه ده لټول شوې. له دې سره روښانه نه ده چې تر کومه وخته پورې به کډوال د ترکيې او اروپايي اتحاديې سياسي لوبو کې بند پاتې وي.
