سونگی وقتلرده روسیه دولتی افغانستان‌ده‌گی جنگری طالبلرنی دستکله‌شی حقیده ییتکرمه‌لر آرقه‌لی گزارشلر نشر قیلیندی. گزارشلرده، عصیانچی طالبلر روسیه دولتی نینگ حمایتینی کسب قیلگن‌لیگی ایتیلگن ایدی.
لیکن، روسیه نینگ افغانستان‌ده‌گی ایلچیسی الکساندر منتیتسیک بوندن ایکّی کون اول مملکت سنا مجلسی نینگ باشلیغی بیلن قیلگن ملاقاتده بو توغریده‌گی بوتون میش – میشلرنی کیسکین رد ایتگن.
بوگون (سه‌شنبه) افغانستانلیک سناتورلرنینگ بیر قنچه‌سی مجلس نینگ عمومی ییغینیده روسیه ایلچیسی نینگ سوزلریگه عکس‌العمل بیلدیریب، رسمی مسکو طالبلرنی حمایت قیله‌دی دیگنلر. سناتورلر، بو توغریده حجت هم یوق ایمس لیگی باره‌سیده تاکید ایتگنلر.
سنامجلسی نینگ اعضاسی نثاراحمد حارس، روسیه امریکا قوشمه ایالتلری بیلن قرمه – قرشیلیگی بولگنی اوچون طالبلرنی حمایت قیلمسلیگی لازم دیگن.
شونینگدیک سناتور محمدحسن هوتک، روسیه ایلچیسی مملکتده‌گی قوراللی طالبلرنی حمایت قیلمسلیگی توغریسیده سنا مجلس اعضالرینی کوندیریش اوچون بو حقده‌گی بوتون حجتلرنی کورسه‌تیشی اوستیده تاکید قیلگن.
سناتورلرنینگ بو خصوصده‌گی تشویشی حقیده جواب بیرگن مجلس نینگ باشلیغی فضل هادی مسلیمار، روسیه نینگ افغانستان‌ده‌گی ایلچیسی کیلگوسی هفته شنبه کونی سنا مجلسی نینگ مخصوص کمیسیونی‌گه بو توغریده تفصیلات بیریشی ممکن دیگن.
بو توغریده مجلس نینگ برچه اعضالری جناب منتیتسک‌دن سوال قیلیشلری امکان سیز ایمس دیدی جناب مسلمیار.
بوندن آلدین طالبلر روسیه آرقه‌لی حمایت بولگن لیگی توغریسیده تشویش بیلدیرگن فراه و قندوز ولایتلری‌نینگ والیسی، رسمی مسکو جنگری طالبلرگه زمانوی قورال اسلحه بیرگن لیگینی ادعا قیلگن ایدی.
