روسیه جمهور رییسی ولادیمیر پوتین نینگ افغانستان بوییچه مخصوص وکیلی ضمیر قابلوف یقینده تورکیه نینگ انادولی خبر آزانسی‌گه بیرگن انترویوسیده رسمی مسکونی افغانستان حدودیده امریکانینگ بیرنیچه حربی قرارگاه‌لری موجودلیگیدن تشویشده ایکنینی بیلدیرگن. او، اگر روسیه مکسیکوده حربی قرارگاه تاسیس ایتگنده امریکا مسئله گه قنده‌ی یانده شر ایدی، دیگن سوزلرنی تیلگه آلیب روسیه‌نی بو باره‌ده بی فرق توره آلمس‌لیگی‌نی تاکیدله گن.
قابلوف امریکانی افغانستانده اوز حربی قرارگاه‌لرینی تاسیس ایتیشدن قنده‌ی مقصدلری بارلیگی تاکیدله‌گننی انگله‌یدی و بیز اولرنی اوز کوزله مقصدلری‌گه ییتیشیش‌لری‌گه مانع بوله میز دیگن. او امریکانی 1979 ییلی ایراندن زوردن هه یده‌ب چیقریلگنیدن سونگ منطقه‌گه قیته کیلیب جایله‌شیشی اوچون زمینه ایستر ایدی. افغانستان ایسه اولرگه منطقه گه قه‌یتیشلری اوچون یخشی فرصت بولدی دیگن معناده گپیرگن روسیه رسمی‌سی، امریکانی بیر یا که ایکی هفته ایچیده اوز حربی قرارگاه‌لری‌گه یوز مینگ کیشی حربیلری‌نی ییرلشتیریش امکانی‌گه ایگه ایکنینی بیلدیرگن.
بوندن تخمیناً ایکی ییل آلدین افغانستان و امریکا رسمی‌لری آره‌سیده امضالنگن امنیتی کیلیشوو نامه‌ده امریکا افغانستان نینگ ایریم منطقه‌لریده حربی قرارگاه تاسیس ایتیش حقی‌گه ایگه. روسیه دولتی بوندن آلدین افغانستان دولتی‌نی امریکا قوشمه ایلتلری بیلن امنیتی بیتیم امضالشی یخشی عاقبت‌لرگه آلیبکیلمسی باره‌سیده آگاهلنتیرگن ایدی. روسیه دولتی امریکانینگ افغانستانده تاسیس ایتگن حربی قرارگاه‌لرینی منطقه بویلب روسیه منفعتی‌نی تهدید ایتیش اوچون قول‌لنیشی‌دن خواطرده. گرچند رسمی کابل امریکانینگ افغانستانده‌گی حربی قرارگاه‌لریدن اوچینچی بیر مملکت‌نی تهدید ایتیش‌لیککه رخصت بیرمس‌لیگی‌نی بار- بار تکرارلب کیلگن. اما افغان رسمی‌لری نینگ اوشبو تاکیدلری روسیه عملدارلرینی ایشانتیره آلمه‌گن.
ضمیر قابلوف عین حالده دنیانینگ افغانستان‌گه کورسته‌دیگن یاردم‌لری درست بیر شکلده افغانستانده برقرارلیک تامینلنیشی اوچون سفر بر ایتیلمه‌گن تقدیرده کیله‌سی 20 ییل ایچیده افغانستان‌نی پرچه‌لنیشی ممکن‌لیگی باره‌سیده هم آگاهلنتیرگن.
روسیه کیینگی آیلرده افغانستان مسئله‌سیگه جدی راق یانده شماقده. تخمیناً بیر ییلدن بیری روسیه رسمی‌لری طالبلر بیلن علاقه‌ده ایکن‌لیکلرینی سر سقله می کیله‌دی. روسیه نینگ افغانستانده‌گی ایلچیسی اوز روسیه وطنداشلری امنیتی تامینلش اوچون روسیه‌نی طالبلر بیلن علاقه‌ده ایکنینی بیلدیرگن. باشقه تاماندن ایریم منبع‌لر روسلرنی افغانستانده امریکا حربیلری‌نی شکست‌لرگه دوچ قیلیش اوچون طالبلرگه قورال اسلحه ییتکزیب بیره یاتگن‌لیککه هم عیبلب کیلگنلر. اما رسمی مسکو اوشبو ادعالرنی هر دایم رد قیلیب کیلگن. روسیه امریکانی افغانستان نینگ شمال ولایتی امنیتی بوزیش آرقه‌لی داعش گروه‌لرینی اوییرلرده جایلشتیریش نیتی بارلیگیدن هم خواطرده.
روسیه‌لیک دیپلوماتلر امریکانی افغانستان آرقه‌لی داعش جنگریلرینی مرکزی آسیاگه نفوذ ایتیش زمینه‌سی نی کوزله یاتگنیدن چوچیماقده‌لر. یقینده روسیه نینگ بیرلشگن ملتلرتشکیلاتی نینگ امنیت کینگشی ده‌گی نماینده‌سی افغانستان نینگ شمال ولایتلریگه تیک اوچرلر آقه‌لی داعش جنگریلری کیلتیریله یاتگنی‌نی ایتگن ایدی.
روسیه اوزاق اوتمیش‌لردن بیری مرکزی آسیانی اوز منفعتی‌نی اسره‌ش اوچون مهم‌لیگی‌نی تاکیدلب کیلگن. در واقع 1991 ییلده سابق شوروی پرچه‌لنیب مرکزی آسیا دولت‌لری مستقل‌لیککه ایریش گنیدن سونگ هم اوشبو مملکت‌لر روسیه تاثیری آستیده قالیب کیلگنلر.
یقینده پایتخت ماسکوده روسیه، چین و پاکستان نماینده‌لری اوزارا اوچره‌شیب افغانستان و طالبلر مسئله‌سی اوستیده بحث ایتدیلر. طالبلر تامانی اوشبو مذاکره‌لرنی خوش قرشیله‌دی. درحقیقت مسکو ییغینی منطق سویه‌سیده طالبان‌نی سیاسی بیر گروه اوله راق تن آلیش‌لیک معناسیده ایدی.
افغانستان دولتی اوشبو ییغین‌گه جدی اعتراض بیلدیریب مذکور اوچره‌شووده افغانستان دولتی نماینده‌سی چقیریلمه‌گنی باره‌سیده ناراضی‌لیک اظهار ایتدی. گر چند روسیه، چین و پاکستان تامنی مسکو ییغینی‌نی افغانستانده برقرارلیک اورنه‌تیش خصوصی‌ده بولیب اوتگنی‌نی تاکیدلب، نوبتده‌گی ییغین‌لرده رسمی کابل وکیل‌لری دعوت ایتیلیشی‌نی هم بیلدیرگن ایدیلر.
نیمه بولیشیدن قطع نظر حاضرگی کونده افغانستان مسئله سیگه روسیه کته تشبث بیلن یانده شماقده. روسیه نینگ افغانستان بوییچه مخصوص وکیلی ضمیر قابلوف نینگ امریکانینگ افغانستانده‌گی حربی قرارگاه توغریسیده‌گی تشویش‌لری در حقیقت افغانستان‌نی دنیا قدرت‌لری اورته‌سیده ینه بیر بارجدی بیر شکلده رقابت میدانی‌گه ایلنگنی‌نی نمایان ایتماقده.
افغانستانده کوچلی بیر سیاسی دولت بولگنده گینه اوشبو خلق ارا رقابتلردن اوز خلقی منفعتی اوچون فایده‌لنیشی ممکن. افسوس که مملکت‌ده دوام ایته‌دیگن سیاسی و حربی بحران افغانستان اهالیسی‌نی بونده‌ی بیر امتیازدن بی بهره قیلگن.
