روسیه رهبری ولادیمیر پوتین نینگ افغانستان بوییچه مخصوص وکیلی و روسیه نینگ کابلدهگی سابق ایلچیسی ضمیر قابلوف یقینده خاور میانه خبر آژانسیگه بیلن اوتکزگن صحبتیده کابل و امریکا افغانستان بویلب داعش جنگریلری نفوذی نینگ آلدینی آلیش اوچون ضروری چاره تدبیرلر کورمهگن تقدیرده روسیه حربیلرینی مذکور جنگریلر مرکزلریگه هجوم قیلیشی ممکن لیگی بارهسیده آگاهلنتیردی.
روسیه سونگی آیلر ایچیده افغانستانده داعش جنگریلری نفوذی آشیب باره یاتگنی خصوصیده تشویش بیلدیرماقده. روسیه تشقی ایشلر وزیری سونگی چاغلرده ناتو کوچلری همده افغانستان دولتیدن افغانستان شمالیده نا معلوم تیک اوچرلر دولت قرهماغیده بولمهگن حدودلرگه قونگنی بارهسیده ایضاح بیریشلرینی سورهگن ایدی. رسمی مسکو افغانستانده فعالیت آلیب باره دیگن غرب دولتلری حربیلری همده افغانستان دولتینی مملکت شمالیده هوا آرقلی داعش جنگریلریگه قورال اسلحهلر ییتکزیب بیره یاتگنی بارهسیده گمان سیرهماقده. رسمی کابل اوشبو تخمینلرنی رد قیلگن.
قابلوف رسمی کابلگه مملکت بویلب، اینیقسه شمالده داعش جنگریلری کون سهیین آشیب باره یاتگنی بارهسیده آگاهلنتیریلگنینی تأکیدلب بو توغریده رسمی کابلنی بیفرق یاندشمس لیگینی بیلدیرگن. اونگه کوره رسمی مسکو داعش جنگریلرینی مرکزی آسیا مملکتلریگه نفوذ قیلیشی بارهسیده خواطرده.
.jpg)
او، کابل حکومتی همده افغانستانده ترورچیلرگه قرشی فعالیت آلیب باره دیگن چیت ایل کوچلری داعشنی افغانستانده یینگیش اوچون ضروری چارهلر کورمهگن تقدیرده مسکونی افغانستان بویلب حربی هجوملر اوتکزیشی احتمالی بارهسیده گپیرگن. ضمیر قابلوف روسیه دولتینی افغانستان آرقلی ترورچی گروهلر جملهدن داعش جنگریلرینی مرکزی آسیا دولتلری حدودیگه نفوذ قیلیشینی قبول قیله آلمهیدی دیگن.
روسیه دولتی انچهدن بیری داعشنی افغانستانده کتّه کوچگه ایلنیب باره یاتگنی بارهسیده تشویشده. رسمی مسکو بوندن آلدین افغانستان بویلب داعش نفوذی نینگ آلدینی آلیش اوچون طالبلر بیلن علاقهده ایکنینی هم سِر سقلهمهگن ایدی. عین حالده افغانستان دولتی نینگ بعضی بیر رسمیلری روسیهنی تاجکستان همده ایران آرقلی طالبانگه قورال اسلحه ییتکزیب بیرگن بولیشی ممکن لیگی بارهسیده هم گپیرگن ایدیلر.
روسیه بلند مرتبهلی رسمیلری ترورچی گروهلرنی تاجکستان افغانستان چیگرهسی آرقلی مرکزی آسیاگه نفوذ قیلیشلری ممکن لیگینی تأکیدلب کیلگنلر. روسیه کیینگی آیلر ایچیده اوز چیگره کوچلرینینگ بیر قسمینی افغان تاجک چیگرهسیده ییرلشتیرگن. شونینگدیک روسیهنینگ اسکندر ناملی راکتلری تاجکستان حدودیده جایلشتیریلگن. روسیه حربیلری اوشبو راکتلر بیلن افغانستان نینگ هر بیر منطقهسینی نشانگه آلیشی ممکن.
داعش جنگریلری افغانستان نینگ شمالی ولایتلریده جانلنیشی مرکزی آسیا دولتلری و روسیهنی تشویشلنتیریشی طبیعی. چونکه افغانستانده فعالیت آلیب باره دیگن داعش جنگریلری آرهسیده مرکزی آسیالیک جنگریلر جملهدن اوزبیکستان اسلامی حرکتیگه وفادار ترورچیلر کوزه تیلگن. اوشبو گروهلرنی افغانستان نینگ شمال ولایتلرینی مرکزی آسیا دولتلریگه نفوذ قیلیش اوچون تنلهگن لیکلری بارهسیدهگی تخمینلرنی رد قیلیب بولمهیدی.
کیینگی آیلر ایچیده اورته شرق اینیقسه عراق و سوریهده داعش جبههلری بیرین کیتین شکستلهنیب داعش جنگریلری هر تامانگه قاچیب کیتگن. سوریه و عراقده مرکزی آسیالیک جنگریلر جملهدن اوزبیکستانلیکلر داعش صفلریده فعالیت آلیب بارگن لیکلری هیچ کیم گه سِر ایمس. ایندی سوریه و عراقدن قاچگن مرکزی آسیالیک داعشچیلرنی پاکستان آرقلی افغانستانگه اوتیب کیلیشدن بولک چارهسی یوق دیک کورینهدی.
.jpg)
کیلهسی آیلر ایچیده عراق و سوریهدن قاچگن مرکزی آسیالیک جنگریلرنی افغانستاننینگ ایریم حدودلری اینیقسه شمالی ولایتلرده کوپراق کوزه تیلیشی کوتیلهدی.
افغانستان دولتی همده امریکا نینگ افغانستاندهگی حربیلری هلیگچه ضمیر قابلوف نینگ سونگی مراجعتی بارهسیده عکسالعمل بیلدیرمهگن. قابلوف افغانستانده امریکه و ناتو کوچلرینی طالبلرگه قرشی کورهشده شکستلنگینی ایتهدی. او، غرب کوچلری اوزاق مدت افغانستان قالیشلری اوچون ایندی جانلنه دیگن داعش جنگریلری خطرینی بهانه قیلیب کورسته دیلر.
ولادیمیر پوتین نینگ افغانستان بوییچه مخصوص وکیلی رسمی مسکونی افغانستانده حقیقی برقرارلیک اورنه تیلیشی طرفداری ایکنینی تأکیدلهگن حالده منطقه دولتلرینی افغانستان تینچلیکنی تأمینلش اوچون اوز ارا کیلیشب آلیشلری ضرورلیگینی ایتهدی.
امریکا حربیلری افغانستانده داعشگه قرشی کورهشده جدی ایکن لیکلرینی بار بار اوقتیریب کیلگنلر. سونگی اوچ ییل دوامیده داعش نینگ خراسان قناتی رهبرلریدن اوچ نفری امریکا حربیلری هوا کوچلری هجومی نتیجهسیده نابود ایتیلگن. امریکا حربیلری نینگ باش قوماندانی کونی کیچه کیلهجکده هم افغانستان بویلب داعشگه رهبر ایتیب تعیینلنه دیگن هر بیر کیمسه ناتو و امریکا حربی کوچلری نشانیگه ایلنیشی مقرر ایکنینی تیلگه آلگن ایدی.
حاضرگی کونده داعش نینگ اساسی مرکزی افغانستان نینگ شرقی ولایتلری جملهدن کنر و ننگرهارده جایلشیب آلگن. افغانستان حربی کوچلری سونگی آیلر ایچیده مذکور حدودلرده داعشگه قرشی اوتکزگن حربی عملیاتلری نتیجهسیده اوشبو گروهگه کته تلفات ییتکزگنینی ادعا قیلهدی.
افغانستان شمالیده هم داعشگه وفادار جنگریلر اساساً جوزجان و سرپل ولایتلریده فعالیت آلیب باره دیلر. هلیگچه مذکور حدودلرده طالبلر بیلن داعش جنگریلری اورتهسیده قانلی آتیشمهلر یوز بیریب، ایکله تاماندن اونلب کیشی نابود ایتیلگن.
غرب و روسیه نینگ افغانستانده داعش و ترورچیلر مسئلهسی اساساً ایکّی ییریک خلق ارا کوچ اورتهسیده اولرنینگ منطقهدهگی منفعتلری اوستیدهگی دوام ایته دیگن رقابلتلرینینگ باشقه بیر کورینیشیدن بولک نرسه ایمس.
