د پروان ولایت بګرام ولسوالۍ رباط سیمه کې د پولیسو ۲۲۲ قطعې ځواکونو لهخوا د تېرې شپې په عملیاتو کې یوه ۶۵ کلنه ښځه وژل شوې او دوه زامن یې نیول شوي دي.
په غبرګون یې نن له غرمې وروسته د دغه کلي سلګونو اوسېدونکیو د چاریکارو ښار په مقاومت څلور لاره کې اعتراض کړی و او د نیول شویو کسانو راخوشې کولو غوښتنه یې وکړه.
د نیول شویو کسانو پلار میر ملک وايي، زامنو یې په یوې خصوصي کمپنۍ کې کار کولو او له هېڅ کوم حزب او خوځښت سره یې اړیکې نه لرلې.
لاریونوالو د امنیتي ځواکونو دغه عملیات خپلسري او نه همغږي شوي بولي. وايي، چې امنیتي ځواکونو له رسمي جواز درلودو او د عدلي او قضايي بنسټونو له حضور پرته د رباط سیمې په کورونو عملیات کړي دي.
لاریونوالو د کابل ـ شمال لویه لار د ټرافیکو پر مخ تړلې او وايي، تر هغوی غوښتنو ته قانع کوونکی ځواب نه وي ورکړل شوي لویه لار به تړلي وي.
د پروان سیمهییزو چارواکیو په خپل استازیتوب د ولایتي شورا رییس غلام بهاوالدین جیلاني لاریونوالو ته د پوښتنې او ځواب اورېدو په موخه ورلېږلی و.
ښاغلي جیلاني لاریونوالو ته وویل، نیول شوي کسان به تر نن ماښام پورې را خوشې او موضوع به د پروان ادارې او د کورنیو چارو وزارت له لوري په جدیت وڅېړل شي.
که څه هم د ولایتي شورا مشر له لاریونوالو وغوښتل خپل استازي د خبرو لهپاره ولایت مقام ته واستوي او لاره خوشې کړي خو اعتراض کوونکیو د دغې غوښتې په ردولو سره د اعتراضونو په دوام ټينګار وکړ.
له دې ټولو سربېره، امنیتي سرچینې چې نه غواړي نوم یې واخیستل شي سلاموطندار ته وايي، دغه عملیات د پروان امنیتي بنسټونو سره له همغږۍ پرته شوي او د دغې کورنۍ د دوو زامنو له نیول کېدو سربېره امنیتي ځواکونو څلور میله کلاشینکوفونه او دوه میله تمانچې هم ترلاسه کړي دي.
