د افغانستان له پاره د روغتیا نړیوالې ادارې استازې ډاکترې ایمان په خپلو خبرو کې وویل، راټولې شوې شمېرې ښيي، چې په افغانستان کې ۲۰ سلنه له پنځو کلونو کم عمره هغه ماشومان مري، چې د واکسین د تطبیق وړ وي، خو نه یې واکسينوي.
اغلې ایمان زیاته کړه، چې په نړۍ کې ۲۲ میلیونه ماشومان واکسیني خدمتونو څخه بې برخې دي او په افغانستان کې ۱/۵ مه برخه ماشومان او میندې د واکسیناسیون له خدمتونو بی برخې دي.
د دې پر وینا، په افغانستان کې له ۱۶۰ زرو تر ۲۰۰ زرو کسانو ته واکسین نه رسېږي، د روغتیا نړیواله اداره له عامې روغتیا وزارت سره د واکسین کېدونکیو سیمو په ډېرولو کې مرستې ته ژمنه ده او خپلو مرستو ته دوام ورکوي.
د روغتیا نړیوالې ادارې د استازې په خبره، په ۲۰۱۶ کال کې باید هغو سیمو ته پاملرنه زیاته شي، چې اوسېدونکي یې د ناامنۍ او جګړې له امله واکسین کمپاین څخه لرې پاتې شوي.
د افغانستان د عامې روغتیا وزارت او د معافیت ورکونې فعالیتونو ملي او نړیوالو کلیدي شریکانو په ګډون نن (دوشنبه) په کابل کې د معافیت ورکونې یا د واکسیناسیون اونۍ پیل شوه.
د معافیت ورکونۍ اونۍ د واکسین په اړه د عامه پوهاوي د لوړولو او په وخت سره د خلکو له خوا د واکسین تر لاسه کولو له اقدامه د ډاډمنېدلو په پار ونمانځل شوه.
غونډې ته د عامې ورغتیا وزارت مرستیال ډاکټر احمد جان نعیم وویل، چې اوسمهال د هېواد په بېلابېلو روغتیایي مرکزونو کې د ورځنیو واکسینونو په جدول کې ۱۲ ډوله واکسینونه شامل دي، چې په وړیا توګه تطبیقېږي.
د روغتیا وزارت مرستیال زیاته کړه، چې د هېواد په ځېنو برخو کې له دغو خدمتونو څخه په لازمه توګه ګټه نه اخیستل کېږي او په دې برخه کې باید د خلکو د پوهاوي کچه لوړه شي.
د ده پر وینا، هڅه کوي، چې بېلابېل پروګرامونه، لکه چاپي تبلیغات، بېنرونو، بروشرونو او پوسټرونه خپاره کړي او د راډیو او ټلوېزیون له لارې د واکسیناسیون په اړه ضروري پیغامونه ورسوي.
نعیم د دې تر څنګ له قومي او مذهبي مشرانو، عالمانو او ښوونکیو وغوښتل، چې د هېواد هر وګړي ته د واکسین پیغام د رسولو په برخه د عامې روغتیا وزارت له کار کوونکیو سره مرسته وکړي.
دغه راز، غونډې ته د یونیسیف ادارې روغتیا مسوول ډاکټر شرین روکي هم وینا وکړه، ده زیاته کړه، چې ولس باید د واکسین په ارزښت پوه کړی شي، چې خپل ماشومان روغتیایي مرکزونو ته ورسوي او د وژونکیو ناروغیو نه خوندي پاتې شي.
د روکي په باور، واکسین په افغانستان کې یو ستر روغتيايي خدمت دی، چې له ۵ کلونو نه د کم عمره ماشومانو د مړینې ۳۵ سلنه کچه راټیټوي.
