د ۲۰۱۶ م کال د سرو زرو توپ به څوک ګټي؟

د فرانسې فوټبال ملي لوبډلې مشهور لوبغاړی انټوین ګریزمین د کرېسټیانو رونالډو په وړاندې ماته ومنله او زیاته یې کړه، چې د ۲۰۱۶ کال غوره فوټبال لوبغاړي جایزه به، نه پخپله او نه هم لیونیل میسي وګټي، بلکې ګټونکی کرېسټیانو رونالډو دی.

د ګول یورو وېبپاڼې د راپور له مخې، د فرانسوي لوبغاړي ګریزمین په وینا، د روان ۲۰۱۶ م کال د سرو زرو توپ د ګټلو له پاره سیالي پاې ته رسېدلې او دغه بال به بل څوک نه، بلکې پرتګالی کپټان کرېسټیانو رونالډو وګټي.

فرانسوی ګریزمین د اروپا په ۱۵ م پړاو فوټبال جام په سیالیو کې ۶ ګولونه وهلي وو او یو مخکښ لوبغاړی و.

نوموړي د اتلولۍ جام ونه شو ګټلی او دغه جام د لومړي ځل له پاره پرتګال وګاټه.

د ډېرو فوټبال پوهانو په اند، دا ځل د دې ډېر چانس و، چې فرانسه د ګریزمین په موجودیت کې د اروپا فوټبال جام اتلولي وګټي او بیا د اټلاټیکو ماډریډ کلب له پاره دغه لوبېدونکی لوبغاړی د روان کال غوره فوټبال لوبغاړي په توګه د سرو زرو توپ جایزه هم ترلاسه کړي.

د فرانسوي فوټبال لوبغاړي ګریزمین په وینا، کرېسټیانو رونالډو ریال ماډریډ ته د اروپا فوټبال کلپونو او دغه راز پرتګال ته د لومړي ځل له پاره د اروپا فوټبال جام ستره اتلولي وګټله او دی، د سرو زرو توپ یوازېنی حقدار دی.

د فوټبال نړیوالې شورا لخوا د روان کال د سرو زرو بال جایزې ترلاسه کولو له پاره د نړۍ ۲۳ کسیزه غورو لوبغاړو لېست راتلونکو میاشتو کې برابر او اعلان شي.

له دغه لېست څخه به بیا ۳ مخکښ لوبغاړي غوره شي او بیا به  د ۲۰۱۷ کال په جنوري میاشت کې د روان کال غوره فوټبال لوبغاړې او د سرو زرو توپ ګټوونکی د سویس په زیوریخ ښار کې اعلان شي.

کرېسټیانو رونالډو تراوسه ۳ ځلې او ارجنټایني لیونیل میسي بیا ریکارډ ۵ ځلې د فوټبال نړېوالې شورا لخوا د کال غوره فوټبال لوبغاړي په توګه د سرو زرو بال جایزه ترلاسه کړې ده.