د کندوز والي ځمکې غصب کړي دي

د کندوز ولایت اوسېدونکي وايي، د دې ولایت والي اسدالله عمر خېل په یو ښارګوټي کې دوه نمرې ځمکه غصب کړې او د ودانۍ جوړولو چارې یې پیل کړي دي.

دوی وویل، له اعتراضونو وروسته د اسدالله عمر خېل او د کندوز ښاروال ملاتړو کسانو اعتراض کوونکو ته خبرداری ورکړی دی.

د والي او ښاروال ملاتړو اعتراض کوونکو ته ویلي، که په چارو کې یې لاسوهنه وکړي څارونوالي ته به یې معرفي کړي.

د سیمې خلک وايي، د والي کسانو له شپې په ګټې سره سیمې ته ودانیز توکي وروړي دي.

د کندوز د مدافع وکیلانو خپلواکې ټولنې سرلارو سلام وطندار ته وویل، د والي له خوا غصب شوې ځمکه د دې ټولنې ده او د دوی له همغږۍ پرته په نیولي شوې ځمکه کار پيل شوي، چې اوسمهال یې د جوړولو چارې درول شوي دي.

د دې ټولنې مشر احمد شاه عرب‌زاده وايي، د کندوز والي دوی ته ویلي، هغه لګښت چې په دغې نمرې شوی دی ور دې کړي او دی به یې په مقابل کې ځمکه بېرته تسلیم کړي.

عرب‌زاده وايي، د کندوز والي ورته ویلي، د دې په پاره یې د مدافع وکیلانو ټولنې په ځمکه د ودانۍ جوړلو چارې پیل کړي، تر څو د ځمکې اصلي خاوندانو ته ټکان ورکړي.

خو د کندوز د والي ویاند سید محمود دانش د والي له خوا د ځمکې غصب ردوي او وايي، د ښارګوټي اوسېدونکو او حکومتي پلاوي ترمنځ داسې هوکړه شوې وه، که ښار ګوټي کې ویشل شوې نمرې یې خاوندان جوړې نه کړي بېرته به يې نمرې مستردې شي.

د سیمې یو شمېر اوسېدونکي وايي، مسوولینو ورته خبرداری ورکړی په دې برخه کې به له رسنیو سره خبرې نه کوي.

بل خوا د کندوز ښاروال نجیب الله عمر خېل سلام وطندار ته وویل، هېڅوک يې له رسنیو سره د مرکو په اړه ګواښلي نه دي او هېڅکله به چاته د ځمکې غصب اجازه ورنه کړي.

د ریپوټونو له مخې د کندوز والي اسدالله عمر خېل په دې وروستیو کې د قرباني شویو امنیتي سرتېرو حقونه د هغوی د کورنیو په ځای د وسله والو طالبانو کورنیو ته ورکړي وو.