د هرات د عامې روغتیا ریاست مسوولین وايي، د کوویډ ۱۹ د تشخیص وسایلو نشتون په دلیل، د دغه ولایت لابراتوار د سېشنبې شپې د حمل ۱۹مې راهیسې تراوسه پورې د وسایلو نه رسېدو له امله تړل شوی دی.
د هرات د عامې روغتیا ریسی عبدالحکیم تمنا وايي، دغو موادو او وسایلو کې «VTM » او «RNA Extractor» شاملیږي، چې د هېواد زیاتره لابراتوارونه د دغو وسایلو کمښت سره مخ دي.
د هغه په وینا، دغه وسایل ټوله نړۍ کې ستونزو ترلاسه کیږي. ښاغلی تمنا وايي، د عامې روغتیا وزارت هم د دغو دوو وسایلو کمښت سره مخ دی او دغه توکي یوازې د روغتیا نړیوال سازمان له لوري چمتو کیږي.
د هرات د عامې روغتیا رییس زیاتوي، د اړتیا وړ توکو او وسایلو نوملړ یې د عامې روغتیا وزارت د اکمالاتو کمیټې ته استولی دی.
د هغه په وینا، ځینې وسایل به د نن چهارشنبې مازیګر او یوه لویه محموله به یې هم تر راتلونکو پنځو ورځو پورې دغه ولایت ته ورسیږي.
ټاکل شوې دغه وسایل د روغتیا نړیوال سازمان په همکارۍ د یوناما الوتکې له لوري هرات ته واستول شي.
ښاغلی تمنا زیاتوي، چې د روغتیا نړیوال سازمان افغانستان ته د دغو وسایلو د استولو ژمنه کړې او په رسېدو سره به یې، په کرونا ویروس له اخته مشکوکو کسانو څخه د سمپلونو اخیستو بهیر پراخ شي.
هرات کې د کرونا ویروس د تشخیص لابراتوار داسې مهال د وسایلو کمښت سره مخ شوی، چې دامهال دغه ولایت کې ګڼ شمېر مشکوک کسان د خپلو معایناتو پایلو ته په تمه دي. یو شمېر دغه کسان وايي، پنځه ورځې کیږي چې د هغوی معاینات نه دي مشخص شوي.
دا داسې مهال دی، چې روغتیاپالان خبرداری ورکوي که د کوویډ ۱۹ ناروغۍ د ازمایښت وسایل هر څه ژر د هرات لابراتوار ته ونه رسیږي، په کرونا ویروس مشکوک کسان به دغه ویروس تر دې زیات ټولنه کې خپور کړي او انساني ناورین به رامنځ ته شي.
هېواد کې تراوسه د کرونا ویروس ۴۲۳ مثبتې پېښې ثبت شوي دي. د عامې روغتیا وزارت د شمېرو په اساس، د کرونا ویروس هېواد کې تراوسه ۱۴ کسان مړه کړي او ۲۰ نور بیا ترې روغ شوي دي.
