د ښارجوړونې چارواکي وايي، چې تراوسه د "بریالیتوب" په نوم پردې پروژه ۷۵ میلیونه ډالره پانګونه شوې، چې له دې پیسو ۲۸ میلیونه ډالر ددغه ښارګوټي پر بنسټیزو چارو لګول کیږي.
د ښوونکو دغه پروژه په ده سبز ولسوالۍ کې د استوګنې لومړنی معیاري ښارګوټی نن (جون۲۱مه) د ښار جوړونې او پوهنې وزیرانو برسېره د کابل ولایتي شورا یو شمیر غړو او ښوونکو په شتون کې پرانستل شو.
د ښار جوړونې وزیر سید سعادت نادري مراسمو ته وویل، چې د استوګنې دغه ښارګوټی په معیاري او د ژوند ټولو اسانتیاوو په پام کې نیولوسره جوړیږي.
" نن موږ د ښوونکو له پاره د ۱۱ سوه نمرو د ملکیت سندونه ویشو.
په لومړي پړوا کې یونیم میلیون ډالره پر بنسټیزو چارو پانګونه کیږي او په وروستیو پړاوونو کې ۵۰۲ د استوګنې نومرې نورې په پلان کې دي چې ښوونکوته ووشل شي. "
نادري زیاتوي، چې تر اوسه ۹۴ ښارګوټي پر ۴۷ زره جریبه ځمکه په ۲۸ ولایتونو کې، چې ۸۵ زره ۷ سوه ۷۵ د استونګې نمرې کیږي، ډیزان او ښوونکو ته د ویش په موخه پوهنې وزارت ته سپارل شوې دي.
په دې اړه د پوهنې وزیر اسدالله حنیف بلخي وايي، چې د نوي کابل پروژه کې د ښوونکو له پاره ۲ زره د استوګنې نمرې ځانګړې شوي، چې له دې شمیرې یې نن ۱۱ سوه نمرې پر ښوونکو وویشل شوې.
نوموړي زیاته کړه، چې د یادو ۲ زرو نمرو له جملې تمه کیږي، چې ۵۰۲ يې د خدای په مرسته د بنسټزو خدمتونو له بشپړیدو وروسته ښوونکو او د پوهنې وزارت کارکوونکو ته ورکول کیږي.
د دغو نمرو په هر متر مربع یې ۵۰۰ افغانۍ بیه ایښودل شوې د درنو ښوونکو له تنخوا په لسو کلونو کې اړوند حساب ته لیږدول کیږي.
بلخي په ټينګار سره وویل، چې د ښوونکو ژوند ښه کول ددغه وزارت له کاري لومړیتوبونو دی.
ده زیاته کړه ترهغو چې ښوونکو ته جدي پام ونه شي د هیواد ښوونیزنظام به وده ونه کړي.
خو یو ښوونکی محمد نذیر بارکزی چې ددې نمرو د سندونو ویش غونډې ته ورغلی و د پوهنې وزارت له مسوولینو غواړي، چې د ښوونکو له پاره ویشل شوې نمرې دې مشخصې کړي.
بارکزي زیاته کړه، تراوسه پورې ښوونکو ته څو ځلې د ملکیت سندونه ویشل شوي، خو ځمکه يي هیڅ وخت ورته مشخصه شوې نه ده.
د یادونې ده، چې د بریالیتوب پروژې بنسټیزې چارې په ۱۳۸۵ لمریز کال د افغانستان پخواني ولسمشر حامد کرزي په واکمنۍ کې پیل شوې وې.
څو میاشتې وړاندې ښوونکو اعتصاب کړی و، چې باید دوی ته د ژمنې سره سم نمرې وویشل شي، خو ولسمشر محمد اشرف غني بیا د هېواد له ټولو ښوونکو بخښنه وغوښته، چې په دغه برخه کې استادانو ته پاتې راغلی او ډېر ژر به پر خپلې ژمنې عمل وکړي.
