د ملي یووالي حکومت اجرایوي رییس عبدالله عبدالله، د عامې روغتیا وزیر فیروز الدین فیروز او یو شمېر نورو افغان چارواکیو په حضور، کابل کې په صحتطفل روغتون کې د ماشومانو د زړه جراحۍ لومړنۍ برخې د بنسټ ډبره کېښودل شوه.
د عامې روغتیا وزیر فیروز الدین فیروز وايي، د زړه ناروغۍ په ځانګړې توګه ماشومانو کې د پراخېدو په حال کې ده او تراوسه پورې شاوخوا ۲۶ زره ماشومان چې په دې ناروغۍ اخته شوي.
د ښاغلي فیروز په وینا، د عامې روغتیا وزارت د سرې میاشتې او خصوصي سکتور په همکارۍ هر کال له ۱۰۰ تر ۲۰۰زرو پورې ماشومان د درملنې لهپاره له هېواده بهر استوي.
اجرایوي رییس عبدالله عبدالله ـ چې دې غونډې کې یې حضور لرلو ـ وویل، سره لهدې چې د روغتیا په برخه کې مهم کارونه شوي؛ خو لا هم زیاتره هېوادوال د ابتدايي درملنې لهپاره له هېواده بهر سفر کوي.
د ښاغلي عبدالله په وینا، د ماشومانو د زړه جراحۍ مرکز جوړېدل، د زړه په ناروغۍ د اخته ماشومانو درملنې په برخه کې یو مثبت ګام دی.
د افغان ماشومانو د زړه جراحۍ لومړني مرکز بنسټ ډبره داسې حال کې کېښودل کېږي چې د زړه په ناروغۍ اخته ماشومان په ډېرو پیسو سره له هېواده بهر لېږدول کېږي.
اوس پهدې ناروغۍ د اخته ماشومانو کورنۍ تمه لري چې دغه مرکز وکولی شي د زړه ناروغۍ په کره تشخیص او درملنه کې ګټور واقع شي.
