د جمعیت ګوند سرپرست صلاحالدین رباني نن په کابل کې د افغانستان د علماوو شورا پخواني رییس مولوي قیامالدین کشاف د کار کړنو د ستاینې یوې غونډې ته په خبرو کې وویل چې د وزارت، سفارت یا معینیت ترلاسه کولو په موخه د بل چا په واک کې ځان شریکول یوه کوچنۍ او نامعقوله موخه ده.
د رباني په وینا، د ګوندونو اصلي موخه د بل په واک کې ځان شریکول نه، بلکې د سیاسي واک ترلاسه کول دي.
صلاحالدین رباني په اوسني حکومت کې د ونډې له اخیستونکو کسانو پوښتنه کوي چې که د حکومت د مشروعیت بنسټ ټاکنې وي، نو د ارګ او سپېدار ترمنځ سیاسي هوکړه د څه لپاره وه. رباني اوسنی حکومت نامشروع او له یوې سیاسي هوکړې راوتلی بولي.
رباني زیاته کړه، جمعیت ګوند به تر هر ډول فشار او دسیسو لاندې اعتدال له پامه ونه غورځوي او تل به د واک په ډګر کې وي.
دا په داسې حال کې ده چې په دې وروستیو کې د یاد ګوند ګڼشمېر مخکښو مشرانو د ګوند د اجرایوي رییس عطامحمد نور په کور کې د صلاحالدین رباني له مشري سره مخالفت وکړ او د هغه پر ځای یې بل کس د جمعیت ګوند لنډمهالی مشر وټاکه. صلاح الدین رباني دغه کار دسیسه وګڼله او ټینګار کوي چې دی د جمعیت ګوند مشر دی.
