د خوست ځاځيمیدان اوسېدونکو خپلې سيمې ته په ورڅېرمه شاوخوا ۱۵ کيلومتره کرښه د هغو پاکستانيو ځواکونو مخه نیولې چې غوښتل یې پر ډېورنډ کرښه اغزن تار وغځوي.
ځایي سرچینې وایي، د ځاځيمیدان خلکو له غبرګونه وروسته پاکستانيو ځواکونو دې ځای کې اوس د اغزن سیم غځولو درولي دي.
پاکستانیو ځواکونو شاوخوا دوې اوونۍ مخکې دې سیمه کې د سیم غځولو کارونه پیل کړيوو.
د سیمې اوسېدونکي تور لګوي چې افغان حکومت له پاکستان سره پر ډېورنډ کرښه معامله کړېده.
د ځاځيمیدان ولسوالۍ دوو ولسي پاڅونوالو د سلاموطندار له لارې له حکومته د غوڅې خبرې غوښتنه کوي چې دوی سپینه خبره وکړي.
د دوی په وینا، کله چې له پاکستانیو ملېشو سره نښته کوي؛ هغوی ورته دلیل راوړي چې افغان مشرانو ورسره د ډیورنډ فرضي کرښه لاسلیک کړېدی؛ خو دوی وايي چې په هېڅ صورت به د لر و بر د وېشلو لهپاره دا کرغېړنه کرښه ونه مني.
د ځاځيمیدان ولسي پاڅونوال زیاتوي چې پاکستان سره د توپ او ټانګ مقابل کې له سپکو وسلو/ کلاشینکوف او بوړي ټوپکه کار اخلي او په وینا یې، دوی د نورو مهماتو ترڅنګ د خوراک او پوښاک توکیو کمښت سره هم مخ دي. د دوی په خبره، که پاکستاني ځواکونه جال تېروي؛ دوی پرې ډزې کوي.
د دې ولسوالۍ اوسېدونکي هم د اغزن سیم له غځولو سره موافق نهدي او په ټینګار سره وايی چې دا د دوی د نیکونو سیمه ده ځکه خو په هېڅ حال دې ته نهدي تیار چې د معاملې لهمخې اغزن سیم تېر شي.
د خوست د والي وياند طالب منګل بیا ځاځيمیدانیانو ته ډاډ ورکوي چې ولایتي اداره به پر خپل ټول توان د دوی ملاتړه وي.
خو ښاغلی منګل د ځایي خلکو هغه تورونه نه رد او نه تایید کړل چې وایي، افغان حکومت پر ډېورنډ فرضي کرښې د اغزن سیم غځولو په اړه له پاکستان سره پټه هوکړه کړې.
دی د ولسونو منندوی دی چې د ولایتي ادارې په ملاتړ یې دا ډول غبرګون ښودلی دی.
افغان حکومت تراوسه پهدې اړه رسمي غبرګون نهدی ښودلی.
شاوخوا یو کال مخکې هم کله ـ چې پاکستانيو ملیشو غوښتل په ځاځيمیدان کې له ډېورنډ کرښې دې غاړه راواوړي ـ د ځایي خلکو له وسلهوال غبرګون سره مخ شول او مرګژوبله ور واوښته.
