د پکتیا ولایت، د زرمت ولسوالۍ اوسېدونکیو نن (چهارشنبه) د ګردېز ـ زرمت لارې نهجوړېدو په اړه لاریون وکړ.
لاریونوال وايي، که څه هم ولسمشر محمداشرف غني شاوخوا ۶ میاشتې وړاندې د دې لارې جوړېدو کار پرانسته، خو تراوسه یې چارې پیل شوي نهدي.
لاریونوالو نن د اعتراض په توګه یاده لار هم وتړله.
دوو لاریونوالو ظاهر اوریاخېل او جانمحمد جلالي له رسنیو سره خبرو کې وویل، د دې لارې په اوږدو کې هېڅ ډول امنیتي ستونزې نهشته او طالبان یې هم مخه نهنیسي.
دوی له اړوندو ادارو وغوښتل چې ژر تر ژره د یاد سړک جوړولو چارې پیل کړي.
خو د پکتیا والي شمیمخان کټوازی د ګردېز ـ زرمت لارې په اوږدو کې امنیتي ستونزې د دې سړک د نهجوړېدو اصلي لامل ګڼي.
نوموړی وايي، حکومت د یادې لارې جوړېدو لهپاره بودیجه ورکړې او یوه خصوصي شرکت یې عملي چارې هم پیل کړي، خو په وینا یې وسلهوال طالبان یې د جوړېدو مخه نیسي او لاریونوال دې هم د هغوی پرضد غږ پورته کړي.
دا په داسې حال کې ده چې تر دې وړاندې هم څو ځله د ګردېز ـ زرمت لارې د جوړېدو چارې پیل شوي، خو تراوسه بشپړې شوي نهدي.
وسلهوالو طالبانو شاوخوا یوه میاشت وړاندې په یوې خبرپاڼې کې لیکلي وو، د دې لارې جوړېدو ته ځکه اجازه نه ورکوي چې امریکايي ځواکونه پرې تګراتګ کوي.
