د عبدالله عبدالله په مشرۍ د پخواني اجراييه رياست يو شمېر کارکوونکي وايي، د يو شمېر لاملونو له کبله يې د ولسمشرۍ د تحليف له مراسمو وروسته معاش نه دی ترلاسه کړی.
د سپېدار ماڼۍ يو سياسي کارکوونکی چې نه يې غوښتل نوم يې خپور شي سلاموطندار ته وويل، له هغه وروسته چې د ولسمشرۍ د تحلف مراسم ترسره شول، د سپېدار د سياسي کارکوونکيو معاشونه نه دي ورکړل شوي.
هغه وايي، له هغه وروسته چې اجراييه رياست له منځه لاړ د دوی معاشونه هم بند شول او اوسمهال د اجراييه رياست یو شمېر کارکوونکي له امتياز پرته مصالحې عالي شورا کې کار کوي.
يوې بلې سرچينې هم د نوم د خپراوي په شرط سلاموطندار ته وويل، د پخوانۍ اجراييه رياست اداري کارکوونکي هم د مصالحې عالي شورا نويو ګمارنو ته په تمه دي چې يو شمېر يې ياده شورا کې ګمارل شوي هم دي او امتياز ترلاسه کوي.
د مصالحې عالي شورا د دفتر رييس قهار عابد وايي چې د پخواني اجراييه رياست د کارکوونکيو د معاش ستونزه به ژر حل شي او دولت يې د معاش ورکړې لپاره ژمن دی.
