د ټاکنو خپلواک کمېسیون کمېشنر سیدحفیظالله هاشمي کابل کې یوې خبري غونډې ته وویل، سره لهدې چې د ولسي جرګې او ولسوالیو شوراګانو ټاکنې د میزان په ۲۸مه کېږي؛ خو د ټاکنو پر سر لا په غزني کې ستونزې نهدي حل شوي او پهدې تړاو یو پایلې ته د رسېدلو په پار خبرې روانې دي.
د ښاغلي هاشمي په وینا، د غزني ټاکنو کې د ښکېلو خواوو توافق ته د نه رسېدلو له امله، امکان شته چې پهدې ولایت کې د میزان په ۲۸مه ټاکنې ونهشي. د ده په وینا، ټاکنو کمېسیون بل انتخاب هم نهلري.
د ټاکنو خپلواک کمېسیون دغه کمېشنر د سیاسي ګوندونو وړاندیز شوې طرحې او د ګلبدین حکمتیار څرګندونو ته په اشارې وايي، د ولسي جرګې او ولسوالیو شوراګانو ټاکنې به په ټاکل شوي وخت وشي او کمېسیون د هر ثبت شوي سټېکر پر وړانډې ځوابویونکی دی.
ښاغلی هاشمي زیاتوي، سیاسي ګوندونه او ډلې باید د کره معلوماتو په بنسټ دریځ غوره کړي.
دا داسې مهال دی چې د حزب اسلامي مشر ګلبدین حکمتیار پرون د یوې غونډې په ترڅ کې ویلي وو، د رایهورکوونکیو د څه باندې ۸ میلیون افغانانو د نوملیکنې په تړاو د ټاکنو کمېسیون اعلان شوې شمېرې ناسمې دي او په وینا یې، د دوی د معلوماتو پر بنسټ، راتلونکیو ټاکنو کې ۳ میلیونه او ۶۰۰زره کسانو نوملیکنه کړېده.
ځېنو سیاسي ګوندونو هم څه موده مخکې ویلي وو، د رایهورکوونکیو د نوملیکنې بهیر شفافیت نهلري او دغه بهیر کې باید بایومیتریک ټکنالوژۍ نه کار واخېستل شي.
