د ټاکنو له‌پاره د رایه ورکوونکیو د نوم لیکنې بهیر پیل شو

ولسمشر اشرف غني، لومړۍ مېرمنې بي بي ګل او اجرایوي رییس عبدالله عبدالله له‌خوا نن ورځ د ولسي جرګې او ولسوالیو شوراګانو ټاکنو له‌پاره د رایه ورکوونکیو نوم لیکنې بهیر رسما پيل شو او دغو مسوولانو خپله نولیکنه وکړه.

اشرف غني په ټینګار سره وویل، درغلي ورته د منلو نه ده او زیاته یې کړه، د ټاکنو خپلواک کمېسیون د هېوادوالو په وړاندې ځواب ویونکی دی.

ښاغلي غني وویل، چې د ټاکنو خپلواک کمېسیون په اداري او امنیتي برخو کې د نوماندانو لاسوهنه د منلو نه ده او د دغو کسانو په وړاندې غوڅ اقدام کېږي.

همدارنګه ولسمشر غني له طالبانو هم وغوښتل چې را روانو ټاکنو کې ګډون وکړي.

د حکومت اجرایوي رییس عبدالله عبدالله هم د رایې ورکوونکیو نوم لیکنۍ ثبت بهیر پیل سره سم امنیتي مسایل جدي ستونزې وبللې او ويې ویل په هغو سیمو کې چې د امنیت ټینګښت يې ناشونی دی باید بله لاره غوره شي.

اجرایوي رییس داسې مهال دا څرګندونې کوي چې بلخ کې د ټاکنو خپلواک کمېسیون مسوولان وايي په دې ولایت کې د رایې ورکونې د ۳۱۴ مرکزونو له ډلې ۱۳، دغه‌راز په کندوز کې د ۵۵ مرکزونو له ډلې ۲۰ او د سرپل د ۳۸ مرکزونو له ډلې ۲۰ هغه یې تر ستر امنیتي ګواښ لاندې دي.

ورته وخت کې ولسي جرګې د رایه ورکوونکیو د نوم لیکنې ثبت بهیر له پيل کېدو هرکلی وکړ، خو د جرګې ځېنو وکیلانو وویل، د هېواد په لېرې پرتو سیمو کې نږدې ۴۰ سلنه هېوادوال پېژندپاڼې نه لري او حکومت باید د دې بهیر د پيل پرځای لومړی په شرایطو برابرو کسانو ته پېژندپاڼې ورکړې وی.