د ټاکنو د خپلواک کمېسیون کمېشنران وايي، چې که د روانې میاشتې تر پایه حکومت د ټاکنو د امنیت او بودجې په اړه اقدام و نه کړي، نو ښايي په روان کال کې ټولټاکنې ترسره نهشي.
دوی د یوې خبري ناستې په ترڅ کې دا هم وویل، سره لهدې چې د روان کال دویمه میاشت له نیمايي هم ور اوښتې، خو لا هم حکومت د دوی د بودجې او امنیت په اړه کوم اقدام نهدی کړی.
د ټاکنو خپلواک کمېسیون کمیشنر او ویاند عبدلبدیع صیاد د سلاموطندار خبریال د دې پوښتنې په ځواب کې، چې که تر یوې میاشتې نور هم حکومت بودجه او د امنیت په اړه ډاډ ور نه کړل شي ایا شونې ده، چې ټاکنې سږکال ترسره شي.
صیاد وویل، ناشونې ده.
« ځکه ټاکنې مقدماتي مرحلې ته ضرورت لري او هره مرحله د قانون سره تړاو لري، چې ۱۸۰ ورځې مخکې موږ باید د ټاکنو مهالویش اعلان کړو، نو شونې به نه وي چې ټاکنې په روان کال کې ترسره کړو»
دغه راز د ټاکنو خپلواک کمېسیون کمیشنر او ویاند زیاته کړه، چې دوی د ټاکنیزو حوزو په برخه کې څه د پاسه یو میلیون ډالر د ماليې له وزارته ترلاسه کړي دي.
دا په داسې حال کې ده، چې تر دې وړاندې هم د چارو کتونکو په وار وار سره داسې اندېښنې په ډاګه کړې وې، چې په روان کال کې به ټاکنې نه ترسره کيږي او ځينې خو ان پهدې باور دي، چې د ملي شورا او ولسوالیو شوراګانو ټاکنې به له ولسمشرۍ ټاکنو سره یوځای ترسره کيږي، خو ولسمشر بیا په ځلونو ویلي چې په روان کال کې به د ملي شورا او ولسوالیو شوراګانو ټاکنې هرو مرو ترسره کيږي.
