د افغانستان فوټبال فدراسیون  پلان لري ترڅو په کابل کې د هندوستان فوټبال ملي لوبډلې سره د فوټبال دوستانه سیالۍ ترسره کړي.

د افغانستان فوټبال فدراسیون د رسنیو څانګې مسوول علي کاظمي سلام وطندار ته وویل، پلان شوی دوستانه فوټبال سیالۍ به د افغانستان او هندوستان حکومتونو او امنیتي ارګانونو د تایید وروسته د نوروز په ورځو کې په کابل کې د شپې له خوا ترسره شي.

کاظمي وویل، د هندوستان فوټبال فدراسیون د دوی بلنلیک منلی دی او اوسمهال د افغانستان فوټبال فدراسیون د افغانستان د امنیتي ارګانونو د مثبت ځواب انتظار کوي.

که د دې فوټبال لوبې اجازه ورکړل شي، نو دا به د څه باندې نیمی پیړۍ وروسته لومړی ځل وي، چې د هندوستان فوټبال ملي لوبډله د سیالۍ له پاره کابل ته راځي.

د هندوستان فوټبال ملي لوبډله وه، چې نه یواځې یې له افغانستان سره د فوټبال نړېواله سیالۍ ترسره کړه ترڅنګ یې لومړۍ لوبډله وه، چې د سیالۍ له پاره د ۱۹۴۱ م میلادي کال اګست میاشتې په ۲۳ مه نیټه د نړېوالې دوستانه سیالۍ له پاره کابل ته راغلې وه.

هغه مهال لومړۍ تاریخي سیالۍ کې هندۍ لوبډلې افغان فوټبال ملي لوبډلې ته ۳ د ۱ ګول په وړاندې ماتې ورکړې وه.

د کال ۱۹۴۱ میلادي کال راهیسي د افغانستان او هندوستان فوټبال ملي لوبډلو ترمنځ ټولټال ۹ نړیوالې سیالۍ ترسره شوي، چې ۷ هندوستان ګټلي، ۱ لوبه برابره شوې، خو د ۲۰۱۳ میلادي کال سویلي اسیا فوټبال جام (فاینل) لوبه کې بیا افغانستان یواځینۍ لوبه کې هندوستان ته ماتې ورکړې ده.

کاظمي زیاته کړه، سیالۍ دوستانه ده، چې د نوي لمریز کال د هرکلي او د افغانستان او هندوستان د ملګرتیا ښودلو په موخه پلان شوې ده.

د افغانستان فوټبال فدراسیون وایي، د پلان شوې سیالۍ پرانیستی او نوی کال لمانځلو له پاره یې رنګین پروګرامونه په پام کی نیولي دي، چې په کې به ښځینه ، نارینه او د هرعمر نندارچیان شتون ولري.

فدراسیون زیاتوي، سیالۍ ته یې لومړني تیارۍ نیولي دي چی د (فوټبال لوبغالي نوی رڼاګانې) ترنامه لاندې به په غازي سټډیوم فوټبال لوبغالي کې ترسره شي.

د فوټبال فدراسیون په وینا، سیالۍ به د افغانستان په تاریخ کی د لومړي ځل له پاره په مصنوعي رڼاګانو کې وشي چې تر ۱۰ زرو ننداچیانو پورې به یې په لوبغالي کې دننه او میلیونونه نور د ټلویزون په پرده ننداره کړي.

افغان فوټبال فدراسیون د را روان نوروز په ورځو کې له هندوستان فوټبال ملي لوبډلې سره د دوستانه فوټبال سیالۍ خبر ورکوي، چې په ۲۰۱۲ م ز کال کې د لومړي ځل له پاره د پاکستان فوټبال ملي لوبډله کابل ته راغلې وه او د افغانستان له خوا یې سخته ماتې خوړلې وه.