د هرات ولایت سیمه ییز چارواکي وايي، چې یوې ډلې وسله والو طالبانو نن (پنج شنبه جولای ۴ مه) له غرمې مخکې د دې ولایت په چشت ولسوالۍ کې د بهرنیو ګرځندویانو پر کاروان برید کړی، چې د یوې میرمنې په ګډون پکې ۶ تنه ټپيان شوي دي.
د والي ویاند جیلاني فرهاد سلام وطندار ته وویل، چې د دغو ګرځندویانو شمېر ۱۱ تنه و او له غور ولایت څخه هرات روان وو، چې د چشت ولسوالۍ په " تګاب سوري" سیمه کې طالبانو پرې برید کړی دی.
له دې مخکې ځینو رسنیو راپور خپور کړی و، چې په دې برید کې ځینې ګرځندویان وژل شوي، خو د والي ویاند دغه راپورونه ردوي.
د فرهاد په خبره، دغه ګرځندویان د امریکا، جرمني، انګلستان او د سکاټلینډ هېوادونو وګړي دي.
د هرات د اوبه ولسوالۍ د امنیه قوماندان شیراغا الکوزی، چې د دغو کسانو د امنیت خوندیتوب مسوولیت یې درلود وايي، چې د چشت ولسوالۍ نه د تېرېدو پر مهال کاروان یې د طالبانو له کمین سره مخ شو، چې په نتیجه کې يې څو تنه ګرځندویان معمولي ټپیان شوي دي.
د الکوزي په خبره، په شوي جګړه کې امنیتي ځواکونو ته زیان نه دی رسېدلی او اوسمهال دغه ګرځندویان د هرات ښار ته لېږدوي.
ویل کېږي، چې دغو ګرځندویانو د بامیانو له ولایت څخه سفر پیل کړی وو او غوښتل، چې له غور ولایت نه هرات ته ولاړ شي.
