د هاوان مرمۍ په سیداباد کې د یوې کورنۍ ۳ ماشومان وژلي

د میدان وردګو ولایت سیمه ییز چارواکي وايي، تېره ورځ مازدیګر مهال په سیداباد ولسوالۍ کې د افغان ځواکونو او وسله والو طالبانو ترمنځ نښته شوې، چې په ترڅ کې درې ماشومان وژل شوي او یوه مېرمن ټپي شوې ده.

د میدان وردګو د والي ویاند عبدالرحمن منګل سلام وطندار وویل، د افغان ځواکونو او وسله والو طالبانو ترمنځ د نښتې پرمهال د سیداباد ولسوالۍ په زرینخېلو سیمه کې د غلام حضرت په نوم د یو ولسي وګړي په کور د هاوان ګولۍ لګېدلې چې له امله یې د دې کورۍ ۳ ماشومان وژل شوي او یوه مېرمن ټپي شوې ده.

منګل وایي، خلک ادعا کوي، چې د هاوان ګولۍ ملي اردو ځواکونو له خوا ویشتل شوې ده.

د والي ویاند وویل، چې د ولایت مقام په لارښوونه د یادې سیمې د ملي اردو امنیتي سرتېري نیول شوي دي.