.jpg)
دواړو لوبډلو خپلو سیالانو سیمرغ البرز او موجهای امو لوبډلو ته په تګ او راتګ پړاو نیمه پای لوبو کې ماتې ورکړې او د افغانستان ۵ م پړاو فوټبال غوره لیګ سیالیو (فاینل) لوبې ته لاره پیدا کړه.
د افغانستان فوټبال غوره لیګ سیالیو د رسمي وېبپاڼې د معلوماتو له مخې، په ننني راتګ پړاو دوه یمې نیمه پای لوبه کې د میوند اتلانو لوبډلې موجهای امو لوبډلې ته ماتې ورکړه.
د ورکړل شویو معلوماتو له مخې، د میوند اتلانو لوبغاړیو له ښې لوبې وروسته د عبدالمنان او فیض فیضي د ښو ګولو په وهلو سره بریا ترلاسه کړه.
په دې بریا سره د میوند اتلانو لوبډلې په تګ او راتګ پړاو نیمه پای لوبو کې بریاوې ترلاسه کړې او د شاهین اسمایي فوټبال لوبډلې پر خلاف یې د اتلولۍ ګټلو له پاره فاینل ته لاره پیدا کړه.
.jpg)
دا لومړی ځل دی، چې د میوند اتلانو فوټبال لوبډله د افغانستان فوټبال غوره لیګ سیالیو پای لوبې ته لاره پیدا کوي.
له دې مخکې په لومړي تګ پړاو نیمه پای لوبه کې هم د میوند اتلانو لوبډلې همدې موجهای امو لوبډلې ته ۳ د ۲ ګولونو پوپیر ماته ورکړې وه.
دغه راز شاهین اسمایي لوبډلې بیا د تګ پړاو نیمه پای لوبه د سیمرغ البرز خلاف ګټلې وه؛ خو د راتګ پړاو لوبه یې وبایلله او په زیاتو ګولونو سره لومړۍ لوبډله وه، چې د ریکارډ څلورم ځل له پاره یې دروانو سیالیو فاینل ته لاره پیدا کړه.
ټاکل شوې ده، دروانو ۵ م پړاو افغانستان فوټبال غوره لیګ سیالیو کې د درېیم مقام ګټلو له پاره د روانې سپټمبر میاشتې پر ۲۹ مه نېټه سیمرغ البرز له موجهای امو سره لوبه وکړي.
.jpg)
دغه راز د ورکړل شویو معلوماتو له مخې، د همدې میاشتې پر ۳۰ مه نېټه د جمعې پر ورځ په (فاینل) لوبه کې د میوند اتلان لوبډله شاهین اسمایي فوټبال لوبډلې سره د اتلولۍ ترلاسه کولو په موخه په کابل (ګول) پروژې فوټبال لوبغالي کې د لوبې ډګر ته ووځي.
د افغانستان فوټبال غوره لیګ په روانو سیالیو کې د هېواد د ۸ زونونو منتخبو لوبډلو برخه اخیستی وه، چې په ۲ ګروپونو کې ولوبېدلې.
د روان فصل په سیالیو کې د اباسین څپې، دفاعي اتله د سپین غر بازان، طوفان هریرود او عقابان هندوکش هغه لوبډلې وې، چې دویم پړاو ته په رسېدو کې پاتې راغلې.
د هېواد فوټبال غوره لیګ سیالۍ د لومړي ځل له پاره په ۲۰۱۲ کال کې په (کابل) کې پیل شوې، چې طوفان هریرود د لومړي پړاو ، شاهین اسمایي د دویم او درېیم پړاو او د سپین غر بازان لوبډله بیا د تېر کال اتله وه.
