د څوو ورځو له شور او احساساتو ډکو لوبو وروسته په فوټبال نړۍوال جام سیالیو کې نن ارامي ده؛ خو دا ارامي یوازې نن د یوې ورځې لهپاره ده او سبا به د روان نړۍوال جام دویم پړاو سیالۍ پیل شي. پهدې پړاو کې به هره لوبډله د مخکې تګ لهپاره یوازې د یوې ښې لوبې چانس ولري.
د لیګ لوبو وروسته دفاعي اتله المان یوازینۍ مشهوره لوبډله وه چې د فوټبال نړۍوال جام په تاریخ کې د لومړي ځل لهپاره له فوټبال نړۍوال جام سیالیو لومړي پړاو څخه بهر شوه.
جاپان بیا یوازینۍ اسیایي لوبډله شوه چې د کمو زېړو کارتونو په اخېستلو او د ورزشي اخلاقو په مراعتولو سره له سینیګال څخه مخکې دويم پړاو سیالو ته ورسېده.
د روسیې په کوربتوب د سږکال ۲۱م پړاو فوټبال نړۍوال جام سیالیو په دوام بېګا وروستۍ ۳ لیګ لوبې وشوې چې لومړی پهکې کولمبیا یو د صفر ګول په مقابل سینیګال ته، ورپسې بلجیم د «جي» ګروپ لومړي مقام خپلولو لهپاره یو د صفر ګول په مقابل کې انګلستان ته او په وروستۍ لوبه کې تونس د همدې ګروپ درېیم مقام خپلولو لهپاره ۲ د ۱ ګول په مقابل کې لومړی نړۍوال جام لوبوونکي پاناما هېواد فوټبال ملي لوبډلې ته ماتې وررکړه.
د ۳۲ ګډونوالو لوبډلو څخه د ۱۶ ورځو لومړي پړاو لوبو وروسته ۱۶ لوبډلو دویم پړاو (پري کوارټرفاینل) ته لاره پیدا کړه چې له نننۍ دمی وروسته به سبا دویم پړاو سیالۍ د ۴ ورځو لهپاره په ۲ سیالیو پیل شي.
د سبا ورځې په لومړۍ یو پر شپارسم پړاو کې به د فوټبال د مشهور لوبغاړي لیونیل میسي په موجودیت کې ارجنټاین د انټوني ګریزمین له لوبډلې فرانسې سره او په ورپسې لوبې کې به د اروپا اتله پرتګال د کریسټیانو رونالډو په موجودیت کې د مشهور لوبغاړي لویس سواریز لوبډلې یوراګوایي لوبډلې سره په (ناک اوټ) لوبې کې سیالۍ وکړي.
د یادونې وړ ده چې د فوټبال په سږني نړۍوال جام سیالیو کې له ګروپ لوبو وروسته ټولو لوبډلو پهخپلو سیالیو کې ګولونه ووهل؛ خو یوراګوای، کروشیا او بلجیم هغه درې لوبډلې وې چې د ګروپ په ټولو سیالیو کې یې بریاوې خپلې کړې.
