د افغانستان د ملي اردو له فساد سره د مبارزې او رڼښت ځانګړي کمېسیون مسوولین وایي، چې دغه کمېسیون د خپلې کاري دورې د پیل راهیسې د ملي دفاع وزارت پر فساد تورن یو زرو ۳۹۴ منسوبین له دندو ګوښه کړيدي.
د ملي دفاع وزارت د استخباراتو او استراتیژیکو چارو مرستیال او د ملي اردو له فساد سره د مبارزې او رڼښت ځانګړي کمېسیون رییس جنرال هلال الدین هلال، نن سهشنبې د (مارچ پر ۲۸مه) په کابل کې خبري غونډې ته وویل، چې دغه کمېسیون د تېر کال د تلې میاشتې راهیسې د ملي دفاع وزارت دغه شمېر منسوبین د پوځي قوانینو د نقض پر تور له دندو ګوښه کړي او دوسیې یې عدلي او قضایي بنسټونو ته استول شويدي.
ښاغلی هلال زیاتوي، چې له دندې ګوښه شوي مسنوبین د ملي دفاع وزارت ملکي او پوځي کارکوونکي دي.
د هغه پر وینا، پهدغو کسانو کې د ملي دفاع وزارت ۹۴۶ افسران، ۲۳۰ معتمدان او محاسبین، ۲۰۹ د قراردادونو امران او ۲۶ تنه هم د ورکشاپ امرین شامل دي.
هلال همدارنګه وایي، چې د فساد ځېنې نورې قضیې هم د دغه کمېسیون تر څېړنې لاندې دي.
د ښاغلي هلال پر وینا، د فساد یو ۳۴۲ بېلابېلې جزایي دوسیې چې ۲ زره او ۴۳ مظنون پهکې شامل دي؛ د څېړنې لاندې دي.
هلال وایي، چې د ۱۱۰۷ تنو افسرانو او بریدملانو او د ملي اردو د ځواکونو دوسیې چې د ملي اردو د اعاشې په خوړلو، دوکه ورکولو، فساد او د وسلو په پلورلو تورن دي د دفاع وزارت په حقوقي برخه کې تر څېړنې لاندې دي
د ملي اردو د روڼوالي د ځانګړي کمېسیون د مسوولانو پر وینا، د ۱۴۱ په فساد ککړو منسوبینو دوسیې د څېړنې لهپاره له فساد سره د مبارزې څارنوالۍ ته لېږل شوېدي.
دغه کمېسیون د ۱۳۹۵ کال د تلې په میاشت کې د ملي اردو د کمزوریو د ارزولو او حل لارو پیداکولو پهپار جوړ شوی و.
