د افغان دولت او طالبانو د مرکچي پلاویو د تماس ډلې بېګاه ماښام خپله لومړنۍ کاري غونډه کړې ده.
د دولت د سولې مرکچي پلاوي په یوه ټویټ کې لیکلي چې دواړو لوریو په یاده ناسته کې د چلن پر اصولو، د خبرواترو د لومړنۍ غونډې پر مهالوېش او ځینو نورو مسایلو بحث کړی دی. ویل کېږي چې یاده غونډه نن هم دوام لري.
د دولت او طالبانو د مرکچي پلاویو د تماس ډله د شنبې په ورځ د سولې خبرواترو له پرانستغونډې وروسته جوړه شوې ده. د دولت د مرکچي پلاوي د تماس ډله ۷ او د طالبانو هم ۵ غړي لري.
محمدمعصوم ستانکزی، احمدنادر نادري، عنایتالله بلیغ، محمد ناطقي، ضراراحمد مقبل، فوزیه کوفي او خالد نور د افغانستان د اسلامي جمهوریت د تماس ډلې غړي دي او مولوي عبدالکبیر، شېرمحمدعباس ستانکزی، نورالله نوري، شیخ دلاور او شیخ قاسم هم د طالبانو د تماس ډلې غړي دي.
ټاکل شوې وه چې د دواړو لوریو د مرکچي پلاویو ترمنځ لومړنۍ غونډه نن دوشنبه جوړه شي، خو د تماس ډلې د غونډو دوام له کبله یاده غونډه ځنډېدلې ده.
د مصالحې عالي شورا رییس عبدالله عبدالله پرون په دوحه کې د یوې خبري غونډې پر مهال تمه وښوده چې د دولت او طالبانو ترمنځ د سولې خبرواترو له پیل سره سم به د تاوتریخوالي کچه کمه شي، څو دا کار د یوه بشردوستانه اوربند لامل وګرځي.
