د بغلان ولایت مرکزي بغلان ولسوالۍ سلګونو اوسېدونکو د کندوز، تخار او بدخشان لویې لارې وتړلې.
د دغې ولسوالۍ اوسېدونکو وروسته له هغې دغه لارې وتړلې، چې د ولایت د مقام دفتر او د کرنې او مالدارۍ پوهنتون د مرکزي بغلان ولسوالۍ څخه د بغلان پلمخري ښار ته انتقال کړل.
اعتراض کوونکو له حکومت نه غوښتل، چې د ولایت مقام دفتر او د کرنې او مالدارۍ پوهنتون دې بېرته د مرکزي بغلان ولسوالۍ ته ولېږدوي.
دوی وايي، تر هغې به دغه اعتراض ته دوام ورکوي، تر څو چې حکومت د دوی غوښتنې نه وې منلي.
اعتراض کوونکو ادعا کوله، چې مرکزي حکومت تېر کال د دغې ولسوالۍ اوسېدونکو دغې غوښتنې ته پام ونه کړ او د دوی په حق ظلم وکړ.
یو اعتراض کوونکي انجینیر زهیر وايي، چې په دې اړه یې څو ځلې د مرکزي حکومت له لوړپورو چارواکو سره خبرې کړي دي او دغو چاروکو په دې برخه کې هیڅ کار و نه کړ.
نوموړی خبرداری ورکوي، که د ملي یووالي حکومت مشران د دوی غوښتنې ونه مني د ولایت دروازې به وتړي.
د والي مرستیال قدیم نیازی او د امنیې قوماندانۍ د امنیت امر عبدالرشید بشیر اعتراض کوونکو ته د قناعت ورکولو له پاره مرکزي بغلان ولسوالۍ ته تللي وو.
دوی له اعتراض کوونکو ته وویل، چې د مرکزي بغلان ولسوالۍ ته د کرنې او مالدارۍ پوهنتون د لېږدلو چارې به له سبا څخه پیلوي او د ولایت مقام دفتر په اړه به ولسمشر پرېکړه و کوي.
