د مالیې وزارت ویاند اجمل حمید عبدالرحیمزي سلام وطندار سره په مرکه کې وویل، چې په جرمني کې د اسیا پراختیايي بانک په کلنۍ غونډه د افغان حکومت په استازیتوب د مالیې وزیر ګډون کوي.
عبدالرحیمزی وايي، چې د مالیې وزیر د سفر موخه د اسیا پراختیايي بانک له چارواکو سره د افغانستان په بنسټیزو پروژو بحث کول دي.
د مالیې وزیر به په دې سفر کې د اسیايي بانک له چاروکو سره له نږدې د افغانستان د اقتصادي لومړیتوبونو په اړه خبرې وکړي، چې په راتلونکي کې له افغانستان سره د بنسټیزو پروژو په برخه کې دغه بانګ مرستې زیاتې کړي.
د ماليې وزیر ویاند وايي، چې د کرنې، ترانسپورټ، انرژۍ ، سړکونو او دې ته ورته په نورو برخو کې په لومړيتونوبو د اسیا پراخیتايي بانک له چارواکو سره خبرې کیږي.
اجمل حمید عبدالرحیمزي وویل، چې د غونډې په څنډه کې به د مالیې وزیر اکلیل حکیمي د اسیا پراختیايي بانک له چارواکو سره د بروکسل کنفرانس په اړه هم خبرې وکړي.
نوموړي زیاته کړه، چې دغه غونډه به د مې میاشتې په دویمه پيل او د همدې میاشتې په پنځمه نېټه پای ته وررسیږي، دوی وايي، چې د مالیې وزیر اکلیل حکیمي به نن (یک شنبې) جرمني ته لاړ شي.
د اسیا پراختیايي بانک د افغانستان له سترو ملاتړکوونکو دی او له ۲۰۰۲ را هیسې په بېلابېلو سیمو کې له افغانستان سره د بنسټیزو پروژو په برخه کې مرستې کړي دي.
له بل لوري د روان کال په اکټوبر میاشت کې د بروکسل کنفرانس هم جوړيږي.
د بروکسل او وارسا کنفرانسونه د افغان امنیتي ځواکونو او د سترو پراختیايي پروژو د مالي ملاتړ په برخه کې خورا مهم دي.
په دې کنفرانسونو کې به د افغانستان د اقتصاد او امنیتي ځواکونو د ملاتړ له پاره مرستې جلب شي.
په دې اړه د کابل پوهنتون د اقتصاد پوهنځي استاد تاج محمد اکبر وايي، چې دغه غونډې په اقتصادي برخه کې د افغانستان په ګټه دي، خو افغان چارواکي باید په دغو غونډو کې له منظم اقتصادي پلانونو سره ګډون وکړي.
له بل لوري د اقتصادي چارو شنونکی محب الله شریف وايي، چې د اسیا پراختیاي بانک په کلنۍ غونډه کې د افغان پلاوی ګدون ضروري دی او زیاته یې کړه، چې افغان لوری باید د اسیايي بانک له چارواکو وغواړي، چې د افغانستان په هغو سیمو کې هم د پروژو ملاتړ وکړي، چې اوس ناامنۍ په کې کمې شوي دي او د بنسټیز پورژو له پاره اړتیا په کې ډيره ده.
شریف وايي، چې د مالیې وزیر باید د اسیايي بانک له چارواکو نه وغواړي، چې د بانکدارۍ په برخه کې کدرونه وروزي.
