د افغانستان په ماليې وزارت کې پیچلي اداري سیسټم د دې لامل شوی، چې د چین او افغانستان ترمنځ د تجارتي مالونو لېږد را لېږد بهیر ودریږي.
د سوداګرۍ خونو مسوولین وايي، د ماليې وزارت په اداري چارو کې د پېچلتیا له امله دوی نه شي کولی، چې د چین او افغانستان ترمنځ د ریل پټلۍ له لارې سوداګریزې راکړې ورکړې وکړي.
د سوداګرۍ خونو ویاند صیام الدین پسرلي سلام وطندار ته وویل، چې د چین د ریل پټلۍ له لارې د نړېوال کوډ نه شتون هم د دغه بهیر پر مخ لوی خنډ دی.
دی وايي، په پام کې وه دغه ریل ګاډي په یوه میاشت کې دوې وارې تګ راتګ وکړي، خو د همدغو لاملونو له وجې نږدې ۳ میاشتې کيږي، چې یوازې ۲ وارې مالونه لېږدول شوي او په بدل کې يې د اړتیا وړ نور توکي بېرته راوړل شوي دي.
د سوداګرۍ خونو ویاند زیاتوي، چې دوی به ډېر ژر د دغې ستونزې د حل په موخه کوټلي ګامونه واخلي.
په دې اړه مو وغوښتل د ماليې وزارت نظر هم واخلو، خو له مکررو تماسونو سره سره بیا هم بریالي نه شو.
د افغانستان او چین ترمنځ د ریل ګاډي پټلۍ له لارې د مالونو لېږد رالېږد بهیر شاوخوا ۳ میاشتې وړاندې د چین جیانګسون ایالت په هایمن ښار کې پېل شو.
