د سولې مشورتي لویې جرګې ځېنې ګډونوالو سلاوطندار ته وايي چې امنیتي ځواکونو له دوو معترضانو سره ـ هغه مهال چې غوښتل یې د ولسمشر او د جرګې د رییس د وینا پرمهال خبرې وکړي ـ بد چلند کړی او هغه یې په وهلوټکولو سره له تالاره ویستلي دي.
د شاهدانو په خبره، یو ځوان هغه مهال چې ولسمشر «د سولې مانع وګڼلو»، په لویې جرګې کې د امنیتي ځواکونو له سخت غبرګون سره مخ شو او بل ځل یوه ښځه وه چې د عبدالرب رسول سیاف د خبرو پرمهال یې اعتراض وکړ چې د ولسمشر د ساتونکیو لهخوا ورسره ناسم چلند وشو.
د سولې مشورتي لویې جرګې ګډونوال وايي چې د جرګې په داخل کې حاکمانه فضا حاکمه ده او ډېر امنیتي ځواکونه هم موجود دي.
ولسمشر غني د یو ګډونوال د اعتراض په مهال وویل چې «له خبرو تېر شي او دا یې ځای نهدی» او «خپلې خبرې دې د کمېټو په چوکاټ کې بیان کړي»
هڅه مو وکړه چې پهدې اړه د سولې مشورتي لویې جرګې د مسوولانو نظر هم واخلو؛ خو بریالي نهشولو.
تر دامهال د دې دوو کسانو د برخلیک په اړه ـ چې په زوره د جرګې له تالاره ویستل شوي ـ هېڅ اطلاعات په لاس کې نهشته.
له رسنیو د ملاتړ ادارې یا نی رییس نوید محمد له سلاموطندار سره په خبرو کې له معترضانو سره بدچلند او د هغوی مخنیوی د اساسي قانون او بیان ازادۍ خلاف عمل بولي. ښاغلی محمدي وايي د افغانستان اساسي قانون د بیان ازادۍ ضمانت کړی او هر ښاروند ته یې د وینا ازادۍ حق ورکړیدی.
د سولې مشورتي لویه جرګه ۳۲۰۰تنه غړي لري چې د هر غړي نظر د کمېټې په چوکاټ کې بحث کېږي. د سولې مشورتي لویې جرګې د دایرولو کمېسیون مشر محمدعمر داودزی وايي چې په هره کمېټه کې د ګډونوالو د حقوقي مدیریت لهپاره دوه تنه دولتي ماموران موظف شويدي.
