ملا مصطفی حقاني او حاجي محسن خان د غور ولایت دوه مشهور سیمه ییز قوماندانان دي، چې له له لسیزو راهیسې له یو بل سره په قومي دوښمنۍ اخته دي او وخت ناوخت له یو بل سره د انتقام اخیستلو په پلمه نښتې کوي.
شاه پسند پهلوي د غور ولایت د شهرک ولسوالۍ ځایناستي ولسوال له سلام وطندار سره په خبرو کې وویل، چې دغه نښته نن (چهارشنبې) سهار ۷ بجې په کمنج، یکه سنګ او پای کوتل سیمه کې پیل شوې او تر اوسه دوام لري. د ده په خبره، دواړه خواوې سپکې او درنې وسلې کاروي او تر اوسه د راکټ او خپمارې د ګولیو له امله څو کورونه وېجاړ شوي هم دي.
د شهرک ځایناستی ولسوال اندېښنه ښيي، چې شېبه په شېبه نښته زور اخلي او که یې د غور چارواکي مخه ونه نیسي؛ د عامو وګړیو مرګ ژوبله به زیاته شي.
د غور د والي ویاند عبدلحی خطیبي وايي، چې تېره ورځ د دې نښتې د کرارولو له پاره یو پلاوی لېږل شوی و او نښته یې پای ته رسولې وه.
خو سیمه ییز چارواکي وايي، چې له سیمې څخه د پلاوی له تګه وروسته بیا نښته پيل شوې ده.
د غور د والي ویاند تاییدوي، چې په دې نښته کې دواړو خواوو ته ۵ تنه مړه شوي او ۵ تنه ټپیان شوي دي.
تر اوسه معلومه نه ده، چې مړینه او ژوبله کومې ډلې ته اوښتې ده.
