د طالبانو په منځ کې په داسې حال کې درزونه ډېر شول، چې د جنګ فصل اوج ته رسېدلی دی.
وروستي راپورنه وايي، چې په قطر کې د افغان طالبانو د سیاسي دفتر پخواني مشر سید طیب اغا له خپلې دندې استعفی کړې.
د دوشنبې پر ورځ د (اګست په ۴مه) الجزیرې ټلویزیون د ملاطیب اغا استعفا لیک ترلاسه کړی دی.
په دغه لیکلي پيغام کې ویل شوي، چې د ملاعمر د مرګ پټ ساتل او د سولې خبرې؛ د پاکستان له خوا پيلېدل سترې تېروتنې وې.
د ده پر وینا، د طالبانو نوی مشر باید هم په افغانستان کې دننه ټاکل شوی وی.
طیب اغا په خپل دغه خپور کړي بیان کې دا هم ویلي، چې د ملا عمر له مړینې وروسته د بهر اوسېدونکو له خوا د ملا اختر منصور د طالبانو د مشر په ډول ټاکل؛ یوه ستره تاریخي تېروتنه وه.
په بیان کې ویل شوي، هر کله چې له افغانستان نه بهر د افغانستان چارو لپاره یو مشر ټاکل شوی هېواد ته یې تاوان رسولی دی.
طیب اغا لیکلي دي، د دې لپاره چې خپل ضمیر ته خجالت او رهبر د دریځ او پالیسۍ نه انحراف ونه کړي؛ په پوره غور سره یې په قطر دفتر کې د افغان طالبانو د سیاسي دفتر له مشرولۍ استعفا کړې ده.
هغه لیکلي دي، چې اوس د اسلامي امارت په هر ډول پيغام، بیان او فیصلې کې کار نه لري او د هیڅ جنګي ډلې ملاتړ نه کوي.
طیب اغا په افغانستان کې د طالبانو د واکمنۍ پر مهال د ملا عمر سېکرتر وو. دی په ۲۰۰۹ز کال کې د طالبانو د سیاسي دفتر مشر شو.
یو شمېر سرچینې وايي، چې د سید طیب اغا د مړینې په اړه دوه کاله وړاندې هم د استفعا دغه ډول خبرونه خپاره شوي وو، چې بیا وروسته دروغ شول.
د طالباني چارو کارپوه وحید مژده د سید طیب اغا د استعفا علت د ملا عمر د مړینې څخه د ده بې خبره پرېښودل وو. په وینا یې ده به په قطر دفتر کې له سیاسي ديپلوماتانو سره په خبرو کې ژمنه ورکوله، چې د هر څه په اړه له خپل مشر ملا محمد عمر سره په اړیکه کې دی، په داسې حال کې چې هغه دوه کاله وړاندې مړ شوی و.
مژده د سید طیب د استعفا بل دلیل دا ګڼي، چې ملا محمد عمر د ژوند تر پایه پاکستان ته د تګ لپاره زړه ښه نه کړ؛ نو د طالبانو نوي مشر هم باید په پاکستان کې نه، بلکې په افغانستان کې ټاکل شوی وی.
مژده د طیب اغا استعفا د سولې د خبرو اترو په برخه کې ګټوره نه بولي، هغه وايي، هیڅوک به تر یوې معلومې مودې پورې د سولې خبرو اترو د پیلولو جرات ونه کړي او تر هغې چې د دوی تر منځ اختلافات نه وي حل شوي؛ د سولې خبرې به پیل نه شي.
د چارو د شننونکو په اند د طیب اغا له دندې پرېښودلو دا جوتېږي، چې د ملا عمر د مړينې د خبر له پخلي وروسته د دوی ترمنځ پراته اختلافات را څرګند شول.
له دې وړاندې هم ځینو نورو طالب مشرانو د طالبانو په ډله کې د وروستيو بدلونونو په اړه غبرګونونه ښودلي وو.
شننونکي وايي، چې دا به وروستی نه ځل نه؛ بلکې نور لوړپوړي طالب چارواکي به هم په نېږدې راتلونکې کې د طالبانو لیکې پرېږدي.
