.jpg)
قاري ظاهر د طالبانو هغه نظامي مسوول دی، چې د افغان امنيتي ځواکونو له لوري په بغلان کې د پوځي عملیاتو پر مهال ټپي شوی و.
د ده د لټولو له پاره زیاتې هڅې وشوې، خو هیڅ څرک يې و نه لږېد؛ ترڅو چې د طالبانو په منځ کې دغه پېژندل شوی څېره د میدان وردګو ولایات امنيې قوماندان خلیل اندرابي په رنجر کې د ملي امنیت د ځواکونو له خوا نیول کيږي.
په بغلان ولایت کې د طالبانو مسوول قاري ظاهر نن یکشنبه(جون ۱۹مه) د خلیل اندرابي په رنجر موټر کې په بغلان ولایت کې نيول کيږي.
داسې ویل کيږي، چې قاري ظاهر پلان درلود، څو د اندرابي په رنجر کې ځان د پلازمينې کابل امن ځای ته ورسوي.
د بغلان امنیتي مسوولین وايي، چې د طالبانو دغه امنیتي مسوول يې سره د دوو نورو کسانو د یاد ولایت په خنجان ولسوالۍ کې نیولي دي.
.jpg)
د بغلان د خنجان ولسوال لطف الله عاطف د سلام وطندار سره په خبرو کې ویلي، چې د طالبانو دغه نظامي مسوول د ملي امنیت د چارواکو له خوا نیول شوی دی.
د بغلان د ملي امنیت یو چارواکي د نوم نه ښودلو په شرط سلام وطندار ته د دغه خبر د تایید ترڅنګ ویلي، چې د قاري ظاهر سره يې دوه نور کسان هم نیولي دي.
هغه ویلي، چې ظاهر د میدان وردګو ولایت د امنيې قوماندان خلیل اندرابي د فامیل سره نږدې اړيکې لري او خپلوان يې کيږي.
سلام وطندار هڅه وکړه، چې په دې اړه د میدان وردګو ولایت د امنيې قوماندان خلیل اندرابي نظر هم واخلي، خو کله چې خلیل اندرابي ته د سلام وطندار د خبریال له لوري موضوع ویل کيږي، نو سم دلاسه ټېلفون پرې قطع کوي.
