د ټاکنو خپلواک کمېسیون مشر ګلاجان عبدالبدیع صیاد نن کابل کې یوې خبري غونډې ته وویل، دغه کمېسیون هڅه کوي چې د ولسي جرګې ټاکنو پر ورځ د رایو ورکوونکیو بایومیتریکولو په موخه، بایومیتریک سیستم رامنځته کړي.
د ښاغلي صیاد په وینا، د بایومیتریک سیستم مالکیت باید د ټاکنو خپلواک کمېسیون سره وي.
د رایو ورکوونکیو بایومیترکول د سیاسي ګوندونو له غوښتنو څخه دي چې تل پرې ټینګار کوي.
د ټاکنو کمېسیون مشر زیاتوي، تروریستي ډلې یو شمېر ګاونډي هېوادونه او د ولسي جرګې یو شمېر غړي، د ټاکنو پر وړاندې د خنډ رامنځته کولو هڅه کوي.
د هغه په وینا، د تلې میاشتې په اتهویشتمه د ټاکنو ترسره کولو لهپاره ټول چمتووالی نیول شوی او دغه کمېسیون ژمن دی چې په ټاکلي وخت رڼې ټاکنې وکړي.
ښاغلی صیاد همدارنګه وايي، د شاوخوا ۸ میلیونو رایو ورکوونکیو نومونه د ټاکنو کمېسیون ډیټابیس کې ثبت شوي او دغه بهیر به د روانې اوونۍ تر پایه بشپړ شي.
په ورته وخت کې د ټاکنیزو شکایتونو کمېسیون مشر عبدالعزیز اریايي وايي، د سیاسي ګوندونو ځېنې غوښتنې په حقه دي او باید ورته لاسرسی وشي.
د ښاغلي اریايي په وینا، هغوی د تلې په ۲۸مه د شکایتونو درج او نظارت ته چمتووالی لېري او د دغه کار لهپاره یې ۶، ۷ زره کسان ګومارلي دي.
ښاغلی اریايي زیاتوي، کوم کسان یا ډلې چې هڅه کوي د ټاکنو ترسره کولو پر وړاندې خنډ رامنځته کړي، د هر ډول پېښو مسوولیت د هغوی په غاړه دی.
دا داسې مهال دی چې څو ورځې وړاندې ستر ملي اېتلاف پورې تړلو کسانو، څو ولایتونو کې د ټاکنو کمېسیون ولایتي دفترونو دروازې وتړلې او د ټاکنو شفافیت لهپاره یې بایومیتریک سیستم څخه د ګټې اخېستلو غوښتنه وکړه.
