د کابل ښار دیارلسمې ناحیې د شهرک صفا ښوونځي لسګونو زدهکوونکیو نجونو لاریون وکړ او ویل یې، استاد، څوکۍ، مېز، کتابونه او درسي ټولګي نه لري.
دغه لاریونوالې زدهکوونکې وايي، د کابل ښار پوهنې مسوولانو یې یوځل ښوونځی تجزیه کړ او هلکان یې بل ښوونځي ته ولېږدول؛ خو له مشخص دلیل پرته یې هلکان بېرته ښوونځي ته راستول چې اوسمهال نجونې د زدهکړنو لهپاره مناسب ځای او درسي ټولګي نه لري.
د عاطفې حسیني په نوم یوه زدهکوونکې وايي، هره ورځ ښوونځي ته ځي راځي خو په ښوونځي کې هېڅ لیک لوست نه شته.
یوه بله زدهکوونکې وايي، د ښوونیز کال په شروع کې د نجونو لهپاره د جلا ښوونځي ژمنې وشوې، خو د هلکانو له لاریون وروسته د نجونو ټولګي یې هلکانو ته ورکړل.
د شهرک صفا ښوونځي سرښوونکې معصومه هم تاییدوي چې زدهکوونکې درسي ټولګي نه لري.
دغه سرښوونکې وايي، د هلکانو له لاریون وروسته په دې پرېکړه وشوه، چې لومړۍ دوره نجونې، په دویمه دوره کې هلکان او نجونې یوځای او د ورځې په وروستۍ دوره کې هلکان درس ولولي.
د پوهنې وزارت د خپرونو رییس کبیر حقمل د دغه ښوونځي د نجونو او هلکانو د عدالت غوښتنې له موضوع ناخبري ښيي او زیاتوي، که زدهکوونکي ورته مراجعه وکړي؛ ژر به یې ستونزه وڅېړل شي.
