د افغانستان د خبریالانو د خوندیتوب کمېټې په ۲۰۱۹ ميلادي کال کې د خبریالانو د وضعیت په اړه نن په کابل کې يوه خبري غونډه کې خپلې موندنې خپرې کړې.
د دې کمېټې د څېړنو پر بنسټ په تېر ميلادي کال کې د خبریالانو پر وړاندې تاوتریخوالی ۱۳ سلنه کم شوی دی.
د يادې کمېټې رییس نجیب شریفي د تاوتریخوالي د کمېدو لامل، په دې برخه کې د حکومت او رسنیو هڅې، له طالبانو سره د سولې خبرې اترې او په افغانستان کې د داعش ډلې تضعیف په ګوته کړ.
د شریفي په خبره، په ۲۰۱۹ ميلادي کال کې د ۲۰۱۸ کال په پرتله د خبریالانو د وژنې شمېرې ۷۱ سلنه را کمې شوې دي.
دا راپور په داسې حال کې خپرېږي چې څه موده وړاندې د افغانستان د ازادو رسنیو د ملاتړ دفتر یا نی ویلي وو چې په ۲۰۱۹ کال کې په افغانستان کې د خبریالانو پر وړاندې تاوتریخوالی د تېرکال په پرتله ۴۲ سلنه کم شوی دی.
