د راپورونو پر بنسټ د جوزجان په درزاب ولسوالي کې په تېر ۱۳۹۴ م لمریز کال کې له ۹۰ زیاتو کسانو په تیزاب څښلو ځانونه وژلي دي.
د یادې ولسوالۍ سيمه ییز مسوولین وايي، چې له دې ډلې ۱۵ کسانو خپل ژوند بایللی او ۷۰ نور تر درملنې لاندې دي.
په همدې حال کې په جوزجان کې د بشري حقونو کمیسیون سیمه ییز دفتر مسوول وايي، چې په دغه ولایت د ځوانانو د ځان وژنې پیښې زیاتې شوې دي.
د درزاب ولسوال رحمت الله حشر نن سه شنبه (می ۳مه) په دغه ولسوالي کې خبري غوندې ته وویل، چې تېرکال په دې ولسوالۍ کې ۹۴نجونو او هلکانو د ځان وژنې په هڅه تیزاب څښلي دي.
حشر، د ځوانانو ځان وژنې لامل په دې ولسوالي کې د ژوند ناوړه شرایط، ټولنیزې او اقتصادي ستونزې بولي.
هاخوا په جوزجان کې د بشري حقونو سازمان سیمه ییز دفتر مشره مغفرت صمیمي، په جوزجان ولایت کې د ځوانانو ځان وژنې اصلي لاملونه نا امني، بې وزلي، کورنی تاوتریخوالی او جبري ودونه بولي.
له دې ټولو سره سره، د بشري حقونو سیمه ییز فعالین، له حکومته غواړي، چې د ځوانانو ترمنځ ځان وژنې ښکارندې سره د مبارزې له پاره یوه منظمه کړنلاره جوړه او د عملي کیدو په موخه یې کوټلي ګامونه واخلي.
