د سوریې د ملي پوځ د هوايي بریدونو له زیاتوالي او ادامې سره د بښنې نړۍوال سازمان په جنګ کې له ښکېلو قدرتونو غوښتي دي چې په سوریه کې د هوايي بریدونو او جنګونو د ودرولو تر څنګ بشردوستانه مرستو ته زمینه برابره کړي.
د راپورونو پر اساس د سوریې د ملي پوځ له لوري په تېرو دوو ورځو کې د ختیځې غوطې دمشق ته څېرمه ۲۵۰ ملکيان وژل شوي او۱۲۰۰ تنه نور ټپيان شويدي. په وژل شویو کې ۵۸ ماشومان او ۴۲ ښځې هم شاملې دي.
د بښنې نړۍوال سازمان په تېرو دوو ورځو کې د سوریې د پوځ له لوري شوي بریدونه «ښکاره جنګي جنایت» ګڼلی دی.
د سوريې رژيم ملاتړو ځواکونو د روسیې په مرسته له یکشنبې راهیسې له مخالفانو نه د ختیځي غوطې د بېرته نیولو په پار بریدونه زیات کړيدي.
ختیځه غوطه د نږدې ۴۰۰ ملکیانو د اوسېدو ځای دی چې په تېرو ۳ میاشتو کې پهکې ۷۰۰ ملکیان وژل شويدي.
د جنګ د زیاتوالي تر څنګ د درملو، سونګ او غذايي موادو نهشتوالی هغه ستونزې دي چې د ختیځې غوطې اوسېدونکي ورسره مخ دي.
