د افغانستان د بلوڅانو شورا نن په کابل کې د بلوڅ قوم د ملي فرهنګ ورځ ونمانځله.
په دې اړه جوړه شوې غونډه کې د بلوڅانو شورا رییس نظام الدین فطرت بلوڅ وویل، د بلوڅانو قوم د افغانستان د قدرت په جوړښت کې ځای نه لري او د دې قوم حقوق تل د حکومت له لوري له پامه غورځول شوي دي.
د بلوڅ په خبره، په اساسي قانون کې ټول افغانان مساوي حقوق لري او حکومت باید د دې قوم غوښتنو ته رسېدنه وکړي.
د سرحدونو او قبایلو وزارت مرستیال محمد یعقوب احمدزي هم په دې غونډه کې وویل چې په افغانستان کې له ۳۰ زیات قومونه ژوند کوي او د بلوڅانو قوم هم د پخوانیو قومونو يو دی چې د هېواد په شاوخوا ۲۸ ولایتونو کې اوسېږي.
د احمدزي په خبره، د بلوڅانو قوم په ټولو برخو کې د حکومت ملاتړ کړی دی.
بلوڅان په افغانستان کې د مېشتو قومونو دي چې هر کال خپله ملي فرهنګي ورځ نمانځي. دا ورځ د نړۍ په ډېر شمېر هېوادونو کې چې بلوڅان اوسي نمانځل کېږي.
