د برهان الدین رباني د تلین په یاد غونډه کې “مرګ پر کرزي شعار”

د برهان الدین رباني د تلین په پنځمې یادغونډې کې یو شمېر ځوانانو "مرګ پر کرزي" شعار ورکړل او د پخواني ولسمشر کرزي د وینا ګډوډولو هڅه وشوه؛ خو کرزي په پوره ځیرکتیا حالت مدیریت کړ.

دغه شعارونه له طالبانو په دفاع د کرزي وروستیو څرګندونو په اړه ورکړل شول.

حامد کرزي په دې وروستیو کې له بي، بي، سي سره په مرکه کې طالبان وروڼه بللي وو او په طالبانو د امریکې د وروستیو بریدونو غندنه کړې وه.

د کرزي دغه ډول څرګنډونې په هېواد له غبرګون سره مخ شوې او ځینو مدني ټولنو یې د محاکمې کولو غوښتنه هم کړې وه.

د رباني په یاد جوړې شوې غونډه کې د ځینو ځوانانو غبرګون پټ پاتې نه شو او د کرزي په خلاف یې د "مرګ شعار" ورکړ.

پخواني ولسمشر کرزي بیا په ځواب کې اعترض او غږ پورته کول د دوی حق وګاڼه او له هغوی یې هرکلی وکړ.

حامد کرزي وویل، "امریکا هره ورځ مرګ پر کرزي شعار ورکوي او دا د بهرنیانو کار دی، دوی غواړي، چې افغانان بې اتفاقه کړي."

د بلخ سرپرست والي عطامحمد نور بیا د دغو ځوانانو د حرکت په غبرګون کې وویل، چې مشرانو ته سپکاوی د جمعیت اسلامي په شان کې نشته او زیاته یې کړه، چې دوی حامد کرزي ته په احترام قایل دي.

په دې یاغونډه کې د برهان الدین رباني زوی صلاح الدین رباني د ځوانانو په دغه حرکت نیوکه وکړه او ویې ویل، چې دوی مشرانو ته په درناوي قایل دي او دغه ډول کار نه شي زغملی.