د بامیانو د ورس او پنجاب ولسوالیو یو شمېر اوسېدونکي وايي، له دوو میاشتو راهیسې د دې ولسوالیو روغتیايي مرکزونو کې د سینهوبغل، رېزش، هډوکو درد، ملا درد او اسهال لهپاره هېڅ ډول درمل نهشته.
د بامیانو د ورس ولسوالۍ اوسېدونکې فاطمه او د پنجاب ولسوالۍ اوسېدونکی معلم احد سلاموطندار ته وايي، د ورس او پنجاب ولسوالیو اوسېدونکي هره ورځ د خپلو ناروغانو درملنې لهپاره د دې ولسوالیو روغتیايي مرکزونو ته مراجعه کوي؛ خو له درملنې او درمل پرته خپلو کورونو ته ستنېږي او یا هم د درملنې لهپاره کابل ته راځي.
دوی د بامیانو د عامې روغتیا له وزارته غواړي چې په لېرو پرتو سیمو کې دې ستونزې ته جدي پام وکړي.
ورته مطالب:
د ولسي جرګې یوې وکیلې په غور کې د یو روغتیايي مرکز دروازه تړلې
د زابل په ولسواليو کې لازمې روغتیايي اسانتیاوې نهشته
د بامیانو مدني فعالان لهدې موضوع اندېښنه څرګندوي او وايي، د ژمي موسم کې په موسمي ناروغیو د اخته کېدو امکان زیات دي او د درملو نهشتوالی به د ناروغانو ژوند له خطر سره مخ کړي.
د بامیانو له مدني فعالانو څخه امین دانشیار وايي، وروسته له هغې ـ چې د روغتیايي خدمتونو وړاندې کولو مسوولیت له Move موسسې څخه د اقاخان AKHS ته وسپارل شو ـ د ولسوالیو روغتیايي مرکزونو کې د روغتیايي خدمتونو وړاندې کولو بهیر ستونزو سره مخ شو.
د بامیانو د عامې روغتیا ریاست سرپرست محمد حسین اخلاقي هم سلام وطندار ته د ولسوالیو یو شمېر مرکزونو کې د درملو د نهشتوالی موضوع تاییدوي او وايي، دغه ستونزه یې څه موده مخکې له AKHS موسسې سره شریکه کړې او دې ستونزې ته یې ژر تر ژره د لاسرسي غوښتنه کړې ده.
وموغوښتل بامیانو کې د روغتیايي خدمتونو وړاندې کولو په تړاو د AKHS موسسې نظر هم ولرو؛ خو پر ډېرو هڅو سربېره بیا هم بریالي نهشو.
هاخوا د بامیانو مدني فعالان وايي، د ورس ولسوالۍ ۵ متخصص ډاکټرانو او د روغتون نږدې ۶۰ روغتیايي کارکوونکیو د خپلو حقونو کمېدو په اعتراض کې استعفا کړېده.
ورس او پنجاب د بامیانو لېرې پرتې او ګڼنفوسه ولسوالۍ دي چې د واورو ورېدو او راشيو د راتلو په دلیل یې مواصلاتي لارې بامیانو سره تړل کېږي او د دغو دوو ولسوالیو اوسېدونکي سخت ژوند تېروي.
درې ورځې مخکې له غوره داسې راپور ورکړل شوی وی چې د دې ولایت د پسابند ولسوالۍ یو شمېر اوسېدونکیو ویلي وو چې د درملو نهشتوالی او د دې ولسوالۍ د روغتیايي مسوولانو نه پام په دلیل، له ۳ اوونیو راهیسې ۳ ماشومانو او ۲ اومیندوارو مېرمنو خپل ژوند له لاسه ورکړیدی.
