د بامیانو ولایت د چاپېریال ساتنې ځېنې فعالان پهدې ولایت کې د امنیتي منسوبینو د ساتونکیو له لوري د وحشي ژویو په ځانګړی ډول د «هوسۍ» له ښکار کولو اندېښمن دي او وايي، د فاریاب ولایت امنیه قوماندان جنرال عبدلمبین ایزدیار ساتونکيو په څوو ورځو کې په غیرقانوني ډول د وحشي ژویو ښکار کوي.
د بامیانو یو اوسېدونکي ابراهیم حفیظیان سلام وطندار ته وویل، د رحمتالله په نامه د دې ولایت د امنیه قوماندان یو کس پرون د کهمرد ولسوالۍ په شکاري دره کې یوه هوسۍ ښکار کړې او د هغې غوښه یې د دې ولایت امنیه قوماندان ته لېږلې ده.
د حفیظیان په وینا، دا د دې پېښې شاهد و او کله یې چې دا خبره په خواله رسنیو کې شریکه کړه؛ د رحمتالله له لوري وګواښل شو.
په ورته وخت کې د بامیانو امنیه قوماندان جنرال عبدالمبین له سلام وطندار سره په خبرو کې لهدې موضوع نه بېخبري وښوده.
ښاغلی ایزدیار وايي، دا تبلیغات دي او پولیس پهداسې کار نهدي مرتکب شوي. د هغه په وینا، پهدې اړه به پلټنې وکړي، کهچېرې داسې کار شوی وي؛ عاملان به یې مجازات شي.
د بامیانو د چاپېریال ساتنې ادارې پهدې اړه پهخپلې فېسبوکپاڼې کې لیکلي: «د چاپېریال ساتنې د رضاکارانه راپورونو او شواهدو پر بنسټ، د دې ولایت پولیس د وحشي ژویو په ښکار مرتکب شويدي، کهچېرې د دې ستونزې مخنیوی ونهشي؛ د وحشي ژویو په ځانګړي ډول د هوسۍ نسل به لهمنځه لاړ شي.
پهدې اړه مو د بامیانو د چاپېریال ساتنې ادارې د ځانګړي نظر اخېستلو هڅه وکړه؛ خو بریالي نهشولو.
د ولسمشرۍ ماڼۍ د ۱۳۸۹ لمریز کال د جوزا د ۱۹مې نېټې د ۱۷۰۰ شمېرې حکم پر بنسټ، د وحشي ژویو ښکار منع دی او هوسۍ د ساتلو له جملې څخه ده. د ولسمشر د حکم لهمخې، امنیتي ځواکونو مکلف دي چې دا حکم پلی کړي.
