.jpg)
افغانستان هغه هېواد دی، چې زیات اوسيدونکي يې د اړتیا پر وخت په عمومي ځایونو کې د خپلې مور، خور او ښځې نومونه نه اخلي او د ودونو په کارتونو کې يې هم له نوم لیکلو ډډه کوي.
د افغانستان په ډیری سیمو کې زیاتره ښځې د خپلو زامنو او میړونو په نومونو پېژندل کيږي.
خو اوس بالاخره دغه وضعیت د دې لامل شوی، چې ځينې مېرمنې په ټولنیزو شبکو کې د دغه دود پر ضد کمپاین پېل کړي.
دوی "زما نوم چېرته دی؟" یا "زما نوم زما پېژندګلوي ده" تر عنوان لاندې دغه کمپاین پېل کړی دی.
د یاد کمپاین له پېله څو ورځې کيږي، خو ظاهراً داسې جوتيږي، چې د خلکو له تود هرکلي سره مخ شوی دی.
په زما نوم چېرته دی؟ کمپاین کې ځينو ښځو د خپلو تجربو کیسې کړې او ځينې هم په دولتي بنسټونو کې خپل لیدلي حالات بیان کړي دي.
د دغه کمپاین تنظیموونکي سلاموطندار ته وویل، د زما نوم چېرې دی؟ کمپاین اصلي موخه د ښځو د پېژندګلوي او هویت لهپاره مبارزه، عدالت غوښتنه او همدارنګه د نوم پټولو د دود ماتول دي.
د یاد کمپاین یو تن تنظیمونکې نیلوفر نیکسر وايي، چې کمپاین يې په ټولنه کې د ښځو پر وړاندې د ناوړه دودونو پر ضد پېل کړی.
نوموړې زیاته کړه، چې په ټولنه کې د ښځو د پيژندګلولي لهپاره يې نوم اخیستل حق دی او له دوی څخه د دغه حق اخیستل ستره جفا ده.
دا وايي، چې په رسمي ځایونو کې د ښځو نومونه نباید د هغوی د مېړونو او اولادونو په نومونو ولیکل شي.
لاله عثماني د کمپاین بله غړې ده هغې سلاموطندار ته وویل، په دغو ورځو کې د دغه کمپاین پېلوونکي په ټولنیزو شبکو کې د خپلو ښځينه نومونو په شریکولو سره یو بل ته چلینج ورکوي.
همدارنګه د کمپاین تنظیموونکي وايي، چې دوی به په خپل دغه نوښت سره د ښځو پر وړاندې دغه ستونزه حل او یاد ناوړه دود به مات کړي.
دا کمپاین په داسې حال کې ترسره کيږي، چې څو ورځې وړاندې سلاموطندار راډيو د مور ورځې په مناسبت همداسې راپور جوړ کړی و، چې ولې ځينې نارینه د خپلو ښځینه نومونو له ویلو شرمیږي؟
داسې ښکاري، چې د سلاموطندار راپور هم د دغه کمپاین په ترسره کولو کې خپل رول لوبولی دی.
