د افغانستان تنکیو ځوانانو ۱۶ کلنې او د سوریې فوټبال لوبډلو ترمنځ د فوټبال نړېواله لوبه په "دوه، دوه" ګولونو برابره پای ته ورسېده.
د افغانستان فوټبال فدراسیون له خوا په خپره شوې خبرپاڼه کې ویل شوي، چې دغه سیالۍ بېګا شپه د کوېټ په کوربتوب ترسره شي.
د خبرپاڼې له مخې؛ په سیالۍ کې افغان لوبډلې لومړی ګول د لوبې لومړۍ نیمایي په ۲۸ مه دقیقه کې ترسره کړ، چې د همدې لومړۍ نیمایي په اضافه دقیقه کې د سوریه لوبډلې بېرته جبران کړ او لوبه د لومړۍ نیمایي ترپایه په یوه یوه برابره شوه.
د فوټبال فدراسیون خبرپاڼه زیاتوي، چې د دویمې نیمایي په ۵۶ مه دقیقه کې یوځل بیا افغان لوبډلې د ګول په ترسره کولو سره د سیالۍ سوریه لوبډلې خلاف ۲ د ۱ پر وړاندې مخکیوالې ترلاسه کړ، خو دغه مخکیوالې هم افغان لوبډلې و نه شو ساتلی.
خبرپاڼه کې راغلي، سوریه لوبډلې یو ځل بیا په افغان ګول بریدونه وکړل، چې د لوبې په ۷۲ مه دقیقه کې یې د افغانستان مخکیوالی پای ته ورسوه او د افغان لوبډلې په څیر یې دویم ګول ترسره کړ.
د ورکړل شویو معلوماتو له مخې، چې دواړو لوبډلو د لوبې قانوني وخت ترپایه د ګول کولو هڅې وکړې، خو پایله یې نه لرله او په پای کې دواړه لوبډلې د روانو سیالیو په لومړۍ لوبه کې په برابرې پایلې سره سلا شوې.
د یادونې وړ ده، چې د اسیا ۱۶ کلنو فوټبال جام سیالیو ته ټاکنیزپړاو سیالیو کې د (ایف) ګروپ لوبې تیره شپه په کویټ کې پیل شوې.
په دې سیالیو کې د افغانستان ترڅنګ سوریه، سریلانکا او کوربه کویټ لوبډلې برخه لري، چې ټاکل شوې ده افغان لوبډله به سبا ماښام ۸ بجې له کوربه کویټ ۱۶ کلنې فوټبال ملي لوبډلې سره د لوبې ډګر ته ووځي.
