امریکالیک سرمایه دار دونالد ترامپ سکیزینچی نوامبر کونی امریکا قوشمه ایالتلری بویلب اوتکزیلگن عمومی سیلاولر نتیجهسیده اوزی نینگ دموکرات رقیبی خانم هیلاری کلینتونگه غلبه قازانیب، امریکا نینگ 45 – جمهور رییسی ایتیب سیلندی.
ترامپ نینگ غلبهسی هم امریکا هم دنیا ده کوپچیلیکنی عجبلنتیریب قویدی، چونکه ایریم سببلر جملهدن دونالد ترامپ نینگ کمپاینی دوریده قیلگن چیقیشلری اینیقسه امریکالیک عیاللر نینگ کته قسمینی اونگه قرشی توتگن موقعی شونینگدیک جمهوریتچیلر نینگ تنیقلی سیاستچیلری ترامپنی قوللب قوتلهمه گنلیکلری کبی مسالهلر کوپچیلیکنی اونینگ سیلاولرده غلبه قازانیشی نا ممکن لیگیگه ایشانتیریب قویگن ایدی.
سیلاولر نتیجهسی اعلان ایتیلگچ هیلاری کلینتون ترامپ غلبهسینی تبریکلب او بیلن یقیندن همکارلیک قیلیش لیککه تیار ایکنینی بیلدیردی. شونینگدیک دونالد ترامپ اوزی نینگ آق اویده امریکانینگ عملدهگی جمهور رییسی باراک اوباما بیلن اوتکزگن ملاقاتی سونگیده اوباما مصلحتلریدن فایده لنیشینی تاکیدلهدی.
دونالد ترامپ نینگ سونگی اظهاراتی اونینگ کمپاین دوریده قیلگن چیقیشلریدن انچه اوزگرگن و یومشهگن. امریکا دنیا نینگ اینگ کوچلی دولتی صفتیده اوزی نینگ معین دولتچیلیک تیزیمیگه ایگه و عین حالده دنیاده ترتیب انتظامنی اسرهش بوییچه هم کته مسوولیتی بار. در واقع اوشبو تیزیم امریکا منفعتلرینی دنیا بویلب حمایت ایتیش اوچون فعالیت آلیب بارهدی.
.jpg)
او ییرده عملدار شخصلر کیم بولیشیدن قطع نظر اوشبو تیزیمگه بوی سونیش لیککه مجبور. امریکا جمهور رییسی هم بوندن مستثنی ایمس البته. ایریم ساحهلر ده جمهور رییسلرنینگ کوز قرهشلری بیر – بیریدن فرقلی بولیب، دنیا سطحیده ایریم مسالهلرگه باشقچهراق یاندهشیشلری ممکن، اما هیچ بیری امریکانینگ ملی منفعتلریگه ضد عمل قیلیشی ممکن ایمس.
دونالد ترامپ آق اویگه باریشی بیلن او اوز سیاستینی اعلان قیلهدی. ترامپ نینگ بعضی بیر ساحهلرده سیاستی دموکراتلردن فرقلی بولیشی کوتیلهدی. مثال اوچون ترامپ داعشگه قرشی کورهشده قتیق قوللیک بیلن یاندهشیشی ممکن. روسیه برابریده امریکا نینگ موقعی یومششی کوتیلهدی. و عین حالده چین و ایرانگه قرشی بیر آز قتیقراق سیاست قوللشی کوتیلهدی.
حاضرگی کونده ترامپنی افغانستان و پاکستان برابریده قندهی یاندهشیشی هر بیر افغاننی قیزیقتیره دیگن مساله سنهلهدی؟
دونالد ترامپ و هیلاری کلینتون اوزلری نینگ مناظرهلریده افغانستان مسالهسینی ایسلهمهگن ایدیلر. بو نرسه در واقع ایکّی تاماننی افغانستان بارهسیده بیر – بیرلریدن فرقلی نظرده بولمهگن لیکلریدن دَرک بیرهدی. دونالد ترامپ امریکا حربیلرینی عراققه باستیریب کیریشلریگه قرشی بولگن لیگینی آچیق آیدین بیان ایتیب کیلگن، اما امریکا نینگ افغانستانده طالبان و القاعدهگه قرشی عملگه آشیرگن هجوملرینی حمایت ایتگن.
.jpg)
عین حالده او ترورچیلیککه قرشی ایاوسیز طرزده کورهش آلیب باریشینی تاکیدله گن. ترامپ نینگ اوشبو چیقیشلری در حقیقت اونینگ حاضرگی کونده ترورچیلیککه قرشی کورهش نینگ قَیناق مرکزلریدن بیری حسابلنه دیگن افغانستانگه بی فرق یاندهشمس لیگیدن دَرک بیرهدی.
دونالد ترامپ پاکستانگه ترور چیلرنینگ حامیسی اولهراق قره یدی و بو نرسه منطقهده دونالد ترامپ دوریدهگی امریکا اوچون افغانستان نینگ اهمیتینی آشیرهدی. ترامپ اتم قورالی گه ایگه بولگن پاکستانگه توله نظارت اورنهتیش لازملیگی گه هم اشاره قیلگن. او امریکا نینگ دموکراتلر دوریده ایرانگه قرشی سیاستینی بار بار تنقید ایتگن.
ایتیب اوتیلگن عامللر نظرده توتیلگن حالده ترامپ اوچون افغانستان اهمیتی ینه – ده آشهدی. قاله بیرسه ترامپ تیمیده افغانستانده خذمت قیلگن و افغانستان وضعیتیدن یخشی خبردار عملدارلر موجودلیگی هم امریکا نینگ ینگی جمهور رییسینی افغانستان مسالهسی گه بیفرق یاندهش مسلیککه آلیب کیلهدی.
دونالد ترامپ کیم؟
2016 ییل سیلاولریده امریکا نینگ 45- جمهور رییسی ایتیب سیلنگن 70 یاشر دونالد ترامپ نیویارک شهریده توغیلگن. آنهسی اسکاتلند مهاجرلریدن بولگن. آتهسی نینگ کته شرکتگه ایگه ایکنی ایتیلهدی. او 1968 – ییلی مشهور بارتون مالیه مکتبینی تماملهگن.
آتهسی نینگ قوریلیش لایحهلریگه همکارلیک قیلگن. تیریشقاق دونالد ترامپ بیر میلیون دالر لیک شرکتینی تاسیس ایتیب اوز فعالیتیگه دوام ایتدیرگن.
او امریکانینگ ایریم شهرلری جملهدن نیوجرسیده قطار بنالر، هوتللر قورگن. ترامپ اوچ مرته اویلنگن. ایکی خاتینیدن اجرهلگن. 80 – ییللرده سیاستگه قیزیققن، اصلاحات حزبی گه قوشیلگن. 2012 ییلی اوزینی جمهورتچی دیب اعلان قیلیب، اوتگن ییلی جمهور رییسلیک مقامی گه اوز نامزادلیگینی اعلان ایتدی. ترامپ بحثلی فکرلری بیلن مشهور. اونینگ "معامله هنری" ناملی کتابی 1978 – ییلی نشر ایتیلگن.
دونالد ترامپ کیلهسی تورت ییل ایچیده امریکا قوشمه ایالتلرینی رهبرلیک قیلهدی. او امریکا تاریخیده کم راق سیاست بیلن شغللنگن اما حیاتی نینگ کته قسمینی تجارتده کیچیرگن رهبر حسابلنهدی. کیلهسی تورت ییل رقیبلری نینگ ترامپ توغریسیده اظهار ایتگن تشویشلرینی نه قدر توغری بولیب بولمهگنینی اثباتلب بیرهدی.
