د افغانستان کرکټ ملي لوبډلې تیزبالر دولت ځدران وایي، چې اوس مهال له خپل بالینګ او کرکټ څخه پوره خوند اخلي.
دولت ځدران چې پرون( دوشنبه) یې د زمبابوې خلاف د ۳ مهمو لوبغاړو اوټ کولو وروسته د لوبې غوره جایزه ترلاسه کړه په رسنیزه غونډه کې له خپل بالینګ رضایت وښود.
د نوموړي په وینا، چې په اوسني وخت کې د خپل بالینګ په بهترینه ریدم او فارم دې کې دی او غواړي، چې دغه لړۍ دوامداره وساتي.
دولت ځدران خبریالانو سره په خبرو کی زیاته کړه، چې هڅه به وکړي د راتلونکې سیالۍ کې هم د خپلې ملي لوبډلې په ګټه د پخوا په څیر ښکلی بالینګ وکړي او روان سفر په اتلولۍ پاې ته ورسوي.
دولت ځدران د زمبابوې په روان سفر کې د شاپور ځدران او حمید حسن په نشت کې د افغانستان تیزبالینګ اټیک په ښکلې توګه په غاړه اخیستی دی.
نوموړي تراوسه په ترسره شویو ۶ رسمي سیالیو کې په ۱۲ ویکټو اخیستلو د روان سفرتر ټولو مخکښه بالرشمیرل کیږي.
نه یواځې په بالینګ کې بلکې دولت ځدران د اړتیا په وخت کې د زمبابوې په روان سفر کې د افغانستان کرکټ ملي لوبډلې په ګټه بیټ لاس کې واخیست او د یو ورځنیو سیالیو پرمهال ېې ټولټال په ۶۱ منډو د افغانستان له خوا شپږم مخکښه بیټسمین و.
تیز توپ اچوونکی دولت ځدران افغان کرکټ ملي لوبډلې ته د کورنیو کرکټ سیالیو څخه غوره شو، چې د ۲۰۱۱ کال په اګست میاشتې کې د لومړي ځل له پاره افغان کرکټ ملي لوبډلې سره د کاناډا سفر ته ولیږل شو.
دولت ځدران اوس مهال ۲۷ کاله عمر لري چې زیاتره د کرکټ مینه وال او کارپوهان یې دبالینګ کولو انداز د پاکستان مشهوره تیزبالر وقار یونس ته ورته بولي.
تراوسه یې ۳۴ یو ورځنیو سیالیو۱۸ شل اوریزه او ۶ فرسټ کلاس لوبو کې د افغانستان په ګټه لوبې ترسره کړي او په ټولیزه توګه یې له ۱۰۰ پورته لوبغاړي سوځولي دي.
نوموړی د حمید حسن او شاپورځدران ترڅنګ دریم هغه بالر دی، چې په دوامداره توګه له ۱۴۰ پورې سرعت کې بالینګ کوي او له همدې کبله یو کامیابه بالر شمیرل کیږي.
